Abakuk 1 - ABIBILIA NGAKIRO NAAJOKAK

¹ Eraakasi nugu ngakiro a Ekapolon Akuj na adwaritae, kidodikinae ekadwaran Abakuk.

Iburae Abakuk kotere ngakiro na nyeriyan

² Wae, Ekapolon Akuj, egoro ayong tanang ori asaki akingarakino towounite iyong akiirar? Ikwa apedori ayong aawanikin atama, “Eyei amoitanut,” Towou iyong ayuun sua.

³ Nyaanu ngakiro kisiteo iyong ayong naaronok? Nyo kitaanyunitor iyong ayong ngichan lugu? Nginyas ka ademanu eyakasi ngaren kang. Eburas ka ekurikur wadaang.

⁴ Elagalagakin etal. Nyeringa ngakiro na eriyan iwapitae. Irikato luaronok lu etenooko, sodi kibukakinae ngakiro na eriyan.

Atachunet a Ekapolon Akuj

⁵ Tatachu Ekapolon Akuj tama, “Kingolik kiding ngibukui, Kuumwok nakitalareta ngakiro na ingolikini. Asubakini ayong ngakiro ngirwa lu iyarea iyong na nyinupi iyong na iirarea.

⁶ Kingolik a, etonyou ayong Ngibabiloniae. Ebukut lokaadengan lo ikirikirana. Itorete kesi kiding akwap daang, tolemasi ngakwapea na nyeraakasi ngakech.

⁷ Eraakasi kesi ngitunga lu kitoemete nabo kitubulete. Esibit kesi ngikulepek eraakasi etal, ka ngakiro na eriyan.

⁸ “Epiraka ngangolei kech akidwang ngirisae, ededeng idwangito ngipeei lu enyamit akoro. Inisuna ngikameak ngangolei kech, eponito anikalonan. Epiraka loger a egole alo eporokino akimuj.

⁹ “Eponito ngajorei kech a amoitanut, ani eringa eponito tobul itwaan daang. Elalak ngirikon kech etia asinyen.

¹⁰ Iyenyete kesi ngikapolok, imenyarito ngikarikok. Ekianatar ngawasea nakaagongok, kainyo etukokinete ngalup lokwaasea kech, sodi tolemasi.

¹¹ Ani erumor topiasi akwap loger a ekuwam, dio torotokis. Ngikasechak kesi ani itiliworitotor ngikilinga kech akuj kech.”

Isuburae Abakuk Akuj nabo

¹² Irai iyong Ekapolon Akuj napei anakisiakinet, Akuj na italeuno, nyitoaneene iyong. Ee Ekapolon Akuj, iseu iyong Ngibabiloniae akirirare sua, iyong na irai ataaba. Itogogong kesi kideseta sua atorikinotor.

¹³ Iyong na ikiuna ngakonyen noi nyingolikinete aronis, nyitamari iyong ititinyikini kiseme asechanu. Nyo bo ililingea iyong tarai na itee ngitunga luaronok emunyarete lu etenooko?

¹⁴ Isikwaan iyong ngitunga ka ngikolea lua anam, kori ngiborei lu eliato analup lu emam ekarikon.

¹⁵ Irumunete Ngibabiloniae kesi daang a ngikodo kiurukukuut nikalapatan a ngipuutei kech, sodi talakaros kiwangakis.

¹⁶ Ipeyonokinete kesi ngipuutei kech kinomanakis tani emitina, kainyo einakinito ngipuutei kesi ajako nabo enyamete akimuj nalok.

¹⁷ Eliworosi tokona kesi ngikaarak jik a? Tomunyasi ngibukui emam ngisien a?