2 Samuel 1 - ABIBILIA NGAKIRO NAAJOKAK

Alimokinio Daudi ngakiro a akitu a Saul

¹ Ekisidi a akitu a Saul, tobongu Daudi ani edwangea Ngiamalek sodi toper Sikilag ngirwa ngiarei.

² Akolongit na ngauni, bu esorokit anadakar a Saul. Ani kona asakea ngesi akidodiun atamar ealolongi, tochilichili ngiworui keng sodi kiwaak apua nakou. Tolot ngesi nia Daudi toriedik idodiunit arimatoi.

³ Kingit Daudi ngesi tama, “Aliwae ibunio iyong?” Tatachak itwaan ngini ngesi tama, “Asii ayong anadakar a Ngisirael.”

⁴ Tolim Daudi tama, “Tolimokinae ayong ngakiro nguna asubakinosi.” Tatachak itwaan ngini tama, “Amatarosi ngasigerea yok alojie, sodi taarae ngitunga yok lukaalak. Taarae tani Saul ka lokookeng Yonasan.”

⁵ Kingit Daudi ngesi tama, “Ikokini iyong iyeni atamar atoaka Saul ka Yonasan ai?”

⁶ Tatachu esorokit ngolo tama, “Ayei ayong moru a Giliboa, sodi ataanyunga Saul egongakina nakwara keng, nakaneni erudunito ngaurukukui ka ngasigerea a ngimoe erikaunito ngesi.

⁷ Abu ngesi toreeun kengolik ayong, sodi katanyar. Ekii ayong atama, ‘Ayong lo ekapolon.’

⁸ Abu ngesi kengit ayong tama, ‘Ngae iyong?’ Atatachak ayong ngesi atama, ‘Arai ayong itwaan a ekitela a Amalek.’

⁹ Katolimok ngesi ayong tama, ‘Bua nege kitaar ayong! Kawanitae ayong lokojokon, nakaneni edikino ayong atoani.’

¹⁰ Sodi atolot ayong ni ayei ngesi ataar, kainyo ayeni ayong atamar adikino ngesi etoani napei edakaror. Atalachu ayong ekiraun anakou keng ngasua na a ngakan keng, nakaneni kainu tokona ayong iyong, ekapolon.”

¹¹ Apot Daudi ka ngitunga daang lu arukitotor ngesi tochila ngiworui kech ialolongete.

¹² Apot kesi kigoro tosutonokis kotere Saul, ka Yonasan, ta Ngisirael lu eraakasi ngitunga a Ekapolon Akuj. Torono kesi akimuj akolongit ngina daang tanang ebong, kainyo aaritae ngitunga lukaalak alojie.

¹³ Kingit Daudi esorokit lo abuni akisisare ngakiro nguna tama, “Aliwae ibunitor iyong?” Tatachu ngesi tama, “Arai ayong itwaan a ekitela a Amalek, nakaneni alomit ayong nakwap kus.”

¹⁴ Kingit Daudi ngesi tama, “Ikokini iyong peikeri akiar ekapolon lo aseuni Ekapolon Akuj ai?”

¹⁵ Abu Daudi tanyarau epei a ngitunga keng tolimok tama, “Taara ngesi!” Taram itwaan ngini esorokit lo ekitela a Amalek ngolo totoan,

¹⁶ isuruori Daudi ngesi ebala, “Eliwor akitu kon ngaka akiding kon, kainyo ilimu iyong ilope atamar iari lokolong aseuni Ekapolon Akuj toliwor ekapolon.”

Egoro Daudi kotere akitu a saul ka Yonasan

¹⁷ Toeok Daudi eeos lo egoror akitu a Saul ka Yonasan lo arai lokookeng,

¹⁸ sodi todung atamar kitatamae ngesi Ngisirael. (Igiritae nakitab a Yochar.)

¹⁹ “Atoaka ngikarikok yok alomoru a Ngisirael! Adakarosi ngasigerea yok nakatitinyok!

²⁰ Nyiilimo alo Gas kori alorotin a Achikelon. Wara ngaberu alo Pilisti nyeelakarosi. Nyiimiek tanakookeng a ngaberu ana nyeraakasi Ngasirael imareteteete.

²¹ “Nyeeram akiru, kori nyeepean ngakop lomukur a Giliboa. Kimiekisi ngamanat kech toliworos eokito jiik! Kainyo eperete ngaupwala alukajwok kaina eraakasi na nyitaleunitoe. Nyeringa aupwal a Saul iwasio akimiet.

²² Aarana akau a Yonasan, echumana ekileng a Saul. Ichumi nikajwon, taar emoit.

²³ “Saul ka Yonasan ngiminan luajokak. Erukito aapei anakiyar, erukito aapei anakitu. Epiraka idwangito ngigolei, egogong idwangito ngingatunyo.

²⁴ “Ngaberu Nasirael, kigoro kotere Saul! Kitanapit ngesi esi ngiworui lukaanikak ajokak, sodi kitanap esi asir ka egolit.

²⁵ “Adakarosi ngasigerea nakatitinyok, apon kesi taarae alojie. Eperi Yonasan alomukur etoanit.

²⁶ “Ealolongi ayong kotere iyong, lokaatokang Yonasan. Kamina ayong iyong noi! Ajok noi eger lo kimina iyong ayong, idwangit tani amina a ngaberu.

²⁷ “Adakarosi ngasigerea nakaatinyok. Aliworosi ngiboro kech a ejie ngipasiek apalikin ajio.”