Zacarías 3 - Biblia SEPT

Cuarta visión A) Restauración do sumo sacerdocio de Iehoxúa

¹ Apareceume en visión o sumo sacerdote Iehoxúa, de pé diante do anxo do Señor, e Satanás estaba á súa dereita para o acusar.

² O Señor díxolle a Satanás: "O Señor reprenderate, Satanás; reprenderate o Señor, que escolle a Xerusalén. Acaso non é máis ca un tizón collido do lume?".

³ Iehoxúa ía vestido con roupas lixosas e estaba de pé diante do anxo.

⁴ Este colleu a palabra e díxolles ós que estaban diante súa: "Quitádelle as roupas lixosas". E a el díxolle: "Olla, retiro de sobre ti a túa iniquidade, pero trata de vestirte con vestidos limpos".

⁵ E engadiu: "Póndelle unha tiara limpa na cabeza". Colocáronlle a tiara limpa na súa cabeza e puxéronlle os vestidos. O anxo do Señor estaba alí de pé.

⁶ Logo o anxo do Señor fíxolle unha declaración a Iehoxúa nestes termos:

⁷ "Así fala o Señor dos Exércitos. Se camiñas polos meus vieiros e se gardas os meus mandamentos, ti gobernarás o meu templo e gardarás os meus adros e dareiche entrada libre entre estes que están aquí.

⁸ Escoita ben, Iehoxúa, sumo sacerdote, ti e os teus compañeiros que sentan na túa presenza porque eles son homes proféticos. Si, vede: vou traer o meu servo, o Refillo.

B) Restauración do sacerdocio e do templo na perspectiva mesiánica

⁹ Si, velaí a pedra que puxen diante de Iehoxúa: sobre esta pedra única hai sete ollos: nela vou esculpir o seu gravado —é o Señor dos Exércitos quen fala— e no mesmo día quitarei a iniquidade deste país.

¹⁰ O día aquel —é o Señor dos Exércitos quen fala— invitaredes cada un ó seu compañeiro, debaixo da parra e debaixo da figueira".