Xuíces 8 - Biblia SEPT

Guideón na outra banda do Xordán

¹ E dixéronlle os homes de Efraím: —"Que é iso que nos fixeches, de non convocáresnos cando fuches á guerra contra os madianitas?" E queixáronse rexamente contra el.

² E respondeulles: —"E que fixen eu agora, comparado co que fixestes vosoutros? E logo non é mellor o rebusco de Efraím cá viña de Abiezer?

³ Nas vosas mans puxo Deus ós príncipes de Madián —a Oreb e a Zeeb—, e que podía eu facer en comparanza convosco?" Daquela, con estas palabras, amainou a ira que se alporizara contra el por aquel feito.

⁴ E chegou Guideón ó Xordán e pasouno cos trescentos homes, que ían derreados, pero abouxando decote.

⁵ E dixo ós veciños de Succot: —"Dádenos, por favor, uns moletes de pan para a xente que me segue, pois están derreados e estou abouxando a Zébah e Salmuná, reis de Madián".

⁶ E responderon os príncipes de Succot: —"E logo xa amarraches a Zébah e Salmuná, de xeito que lle deamos pan ó teu exército?"

⁷ E dixo Guideón: —"Daquela, cando Iavé poña a Zébah e Salmuná nas miñas mans, raspiñarei as vosas carnes con espiños e cardos do deserto".

⁸ E subiu de alí a Penuel, e faloulles do mesmo xeito. E os veciños de Penuel respondéronlle o mesmo cós de Succot.

⁹ E dixo tamén ós homes de Penuel: —"Cando volva vitorioso, derrubarei esta torre".

¹⁰ E Zébah e Salmuná estaban en Carcor co seu exército: uns quince mil, que eran todos os sobreviventes de todo o campamento de orientais (pois os mortos foran cento vinte mil homes, abatidos pola espada).

¹¹ E subiu Guideón polo camiño dos que vivían en tendas ó oriente de Nóbah e de Iogbehah, e mallou no campamento, que entón estaba confiado.

¹² E emprenderon a fuxida Zébah e Salmuná, e abouxounos, ata pillar os dous reis de Madián —Zébah e Salmuná—, enchendo así de terror a todo o campamento.

¹³ E tornou Guideón —o fillo de Ioax— da batalla pola costa de Heres,

¹⁴ e pillou a un mozo dos veciños de Succot, e preguntoulle a el, e el describiulle ós príncipes de Succot e ós seus vellos: setenta e sete homes.

¹⁵ E chegou onda os veciños de Succot e dixo: —"Velaquí a Zébah e a Salmuná, polos que me aldraxastes, dicindo: E logo xa amarraches a Zébah e Salmuná, de xeito que deamos pan ós teus homes derreados?"

¹⁶ E colleu ós vellos da vila, e espiños e mais cardos do deserto; e con eles fíxolles saber o que era bo ós veciños de Succot.

¹⁷ E derrubou a torre de Penuel e matou ós homes da vila.

¹⁸ Daquela, díxolles a Zébah e a Salmuná: —"Como eran os homes que matastes no Tabor?" E responderon: —"Como es ti, así eran eles: uns e outros semellaban fillos de reis".

¹⁹ E engadiu el: —"Eran meus irmáns, fillos de miña nai. Vive Iavé!, que, se os deixásedes vivir, non vos mataría".

²⁰ E díxolle a Iéter, o seu primoxénito: —"Anda, mátaos!" Pero o rapaz non desenvaiñou a súa espada, pois tiña medo, por ser aínda moi novo.

²¹ E dixeron Zébah e Salmuná: —"Érguete ti e arremete contra nós, pois como é o home así é a súa forza". E ergueuse Guideón e matou a Zébah e a Salmuná, e colleu as medias lúas que penduraban dos pescozos dos seus camelos.

Prevaricación de Israel e morte de Guideón

²² E dixeron os homes de Israel a Guideón: —"Manda ti sobre nós —ti e mais teu fillo e o fillo de teu fillo—, pois nos salvaches das mans dos madianitas".

²³ E respondeulles Guideón: —"Non mandarei eu sobre vós, nin tampouco mandará meu fillo: será o Señor quen mande sobre vós".

²⁴ E engadiu Guideón: —"Pídovos unha cousa: que cada un me deades un anel dos vosos espolios" (xa que os espoliados tiñan aneis de ouro, pois eran ismaelitas).

²⁵ E dixeron: —"De certo darémoschos". E tenderon un manto e botaron alí cadanseu anel dos espolios.

²⁶ E foi o peso dos aneis de ouro que pediu mil setecentos siclos de ouro, á parte das medias lúas, os pendentes e vestidos de púrpura que levaban os reis de Madián, e á parte dos colares que pendían do pescozo dos seus camelos.

²⁷ E Guideón fixo un efod e colocouno no seu pobo —en Ofrah—, e prostituíuse alí todo Israel detrás del, resultando así un lazo para Guideón e para a súa casa.

²⁸ E quedou humillado Madián ante os fillos de Israel e xa non levantou cabeza. E o país quedou tranquilo durante corenta anos nos días de Guideón.

²⁹ E foi Ierubaal —o fillo de Ioax— e habitou na súa casa.

³⁰ E Guideón tivo setenta fillos —nacidos todos del—, pois tiña moitas mulleres.

³¹ E a súa concubina —a que estaba en Xequem—, pariulle tamén un fillo e púxolle de nome Abimélec.

³² E morreu Guideón —o fillo de Ioax— en boa vellez; e foi sepultado na sepultura de Ioax —seu pai— en Ofrah de Abiezer.

³³ E aconteceu que, en morrendo Guideón, volveron ás andadas os fillos de Israel e prostituíronse detrás dos baales, e tiveron como deus a Baal—Berit.

³⁴ E non se lembraron os fillos de Israel do Señor, o seu Deus, que os librara das mans de todos os seus inimigos do arredor.

³⁵ Nin tiveron misericordia coa casa de Ierubaal (Guideón) despois de tanto ben como fixera con Israel.