Xuíces 6 - Biblia SEPT

Opresión de Madián, e vocación de Guideón

¹ Fixeron o mal os fillos de Israel diante de Iavé, e púxoos o Señor nas mans de Madián durante sete anos;

² caeu con forza a man de Madián sobre Israel; e, por mor dos madianitas, os fillos de Israel tiveron que aproveitar as fendas que hai nas montañas, as covas e refuxios.

³ E acontecía que, cando Israel sementaba, subían os madianitas; e os amalecitas e os orientais subían tamén contra el.

⁴ Acam—paban onda eles e estragaban o froito da terra, ata a entrada de Gaza, e non deixaban vituallas en Israel: nin ovellas, nin bois, nin asnos

⁵ (pois subían eles co seu gando e mais as súas tendas, e caían coma nube de lagostas, xa que, tanto eles coma os seus camelos, eran innumerables; e viñan ó país para esgotalo).

⁶ Empobreceu de abondo Israel por culpa dos madianitas e os fillos de Israel clamaron polo Señor.

⁷ E, cando os fillos de Israel berraron a Iavé por mor dos madianitas,

⁸ enviou o Señor un profeta ós fillos de Israel, que lles falou así: —"Isto di o Señor, Deus de Israel: Eu fíxenvos subir de Exipto, saqueivos da casa da escravitude,

⁹ e salveivos das mans de Exipto e das mans de todos os que vos oprimían, e chimpeinos de diante de vós, e entregueivos o seu país.

¹⁰ E díxenvos: Eu son o Señor, o voso Deus; non veneredes os deuses dos amorreos (os da terra onde morades). Pero non escoitastes a miña voz".

¹¹ E chegou un anxo do Señor e sentouse debaixo da aciñeira que hai en Ofrah, que é de Ioax o de Abiezer; e Guideón —o seu fillo—, estaba batendo o gran de trigo no lagar, ás escondidas dos madianitas.

¹² E viuno o anxo do Señor, e díxolle: —"Que o Señor estea contigo, home valente!"

¹³ E replicoulle Guideón: —"Escoita, meu señor: se Iavé está connosco, por que nos atopamos con todo isto?; e onde van todos os seus milagres que nos contaron nosos pais, dicindo: Logo non nos fixo subir Iavé de Exipto?; e agora o Señor rexeitounos e púxonos nas mans dos madianitas".

¹⁴ Entón volveuse a el Iavé e dixo: —"Vai con esa forza que tes e salva a Israel das mans dos madianitas. E logo non te envío eu?"

¹⁵ E replicoulle: —"Perdón, meu Señor, de que xeito vou eu salvar a Israel? Velaquí que o meu clan é o máis pobre de Menaxés e eu son o máis novo da casa de meu pai".

¹⁶ E díxolle Iavé: —"Xa que eu estarei contigo, baterás ós madianitas como se dun só home se tratase".

¹⁷ E engadiu Guideón: —"Por favor, se atopei benquerenza ós teus ollos, fai para min un sinal de que es ti quen está falando comigo.

¹⁸ Rógoche que non te retires de aquí, ata que eu chegue onda ti e che traia o meu agasallo e cho presente diante". E dixo Deus: —"Descoida, que eu permanecerei ata o teu regreso".

¹⁹ E Guideón foi para dentro, e arranxou un cabrito; e cun efah de fariña fixo bolos de pan ácimo; e puxo a carne nun cesto e o prebe nunha ola, e sacoullo todo para debaixo da aciñeira, e ofreceullo.

²⁰ E díxolle o anxo de Deus: —"Colle a carne e mais os bolos e póusaos nesa pedra; e o prebe, tírao". E fíxoo así.

²¹ Entón, o anxo de Iavé alongou o bico do bastón que tiña na súa man e tocou a carne e os bolos; e da pedra xurdiu lume que consumiu a carne e mais os bolos; e o anxo de Iavé desapareceu da súa vista.

²² Daquela viu Guideón que era o anxo do Señor, e dixo: —"Ai, meu Señor Iavé, que vin o anxo de Iavé cara a cara!"

²³ E respondeulle o Señor: —"Paz para ti. Non teñas medo, non vas morrer".

²⁴ E construíu alí Guideón un altar para o Señor, e chamoulle Iavé Paz, ata o día de hoxe. Está en Ofrah de Abiezer.

²⁵ E aconteceu que aquela noite lle dixo o Señor: —"Colle o xovenco de touro que ten teu pai e mais o outro xovenco —o de sete anos—, e chimpa por terra o altar de Baal de teu pai, e corta o cipo que está a carón del,

²⁶ e edifica un altar ó Señor, o teu Deus, no cume deste penedo de acordo co establecido; e colle o segundo xovenco e ofrece un holocausto coa leña do cipo que chimpaches por terra".

²⁷ E colleu Guideón dez homes de entre os seus servos, e fixo como lle falara o Señor, pero, como tiña medo a facelo de día —por mor da casa de seu pai e dos homes da vila—, fíxoo pola noite.

²⁸ O se ergueren pola mañá os homes da vila, viron o altar de Baal chimpado por terra; e o cipo que estaba a carón del derrubado; e o segundo xovenco ofrecido sobre o altar que construíran.

²⁹ E dixéronse uns a outros: —"Quen argallou isto?" E preguntaron, pescudaron e resolveron: —"Esta argallada fíxoa Guideón, o fillo de Ioax".

³⁰ E dixeron os homes da vila a Ioax: —"Trae para acó a teu fillo e que morra, pois chimpou por terra o altar de Baal, e derrubou o cipo que estaba a carón del".

³¹ E respondeu Ioax a todos os que estaban contra el: —"Logo vós defendedes a Baal? Seica queredes salvalo? O que o defenda, morrerá antes da mañá. Se é deus, que se defenda el, pois foi o seu altar o que se chimpou por terra".

³² E aquel día púxolle de nome Ierubaal, dicindo: —"Deféndase contra el, pois chimpoulle por terra o seu altar".

³³ E todos os madianitas e amalecitas, e mais os orientais, congregáronse, e pasaron para esta banda e acamparon na terra cha de Iezrael.

³⁴ E o espírito do Señor entrou en Guideón, e tocou a trompeta, e acudiron os de Abiezer con el;

³⁵ e enviou mensaxeiros por todo Menaxés, e acudiron tamén onda el; e enviou mensaxeiros a Axer, a Zebulón e a Naftalí, e subiron ó encontro deles.

³⁶ E dixo Guideón a Deus: —"Se pensas salvar a Israel pola miña man, como dixeches,

³⁷ velaquí que eu vou colocar unha guedella de lá na eira. Se soamente hai xeada enriba da guedella, estando enxoita a terra, coñecerei que salvarás a Israel pola miña man, tal como dixeches".

³⁸ E aconteceu así. E levantouse de mañanciña, torceu a guedella, enxugou a xeada da guedella, e encheu de auga unha cunca.

³⁹ E dixo Guideón a Deus: "Non se alporice a túa ira contra min se falo unha vez máis. Déixame probar soamente outra vez coa guedella: que quede enxoita só a guedella, e que haxa xeada por toda a terra".

⁴⁰ E fixo Deus así aquela noite, e houbo secura só na guedella, mentres que había xeada por toda a terra.