Xuíces 10 - Biblia SEPT

Dous "Xuíces Menores": Tolá e Iair

¹ E despois de Abimélec ergueuse para salvar a Israel Tolá, fillo de Puah, fillo de Dodó, un home de Isacar; e habitou en Xamir, na serra de Efraím.

² Xulgou a Israel durante vintetrés anos. E morreu e foi sepultado en Xamir.

³ Despois del, ergueuse Iair, galaadita, quen xulgou a Israel durante vintedous anos.

⁴ E tiña trinta fillos, que cabalgaban sobre trinta asnos e que eran os donos de trinta cidades, nomeadas ata o día de hoxe Havot—Iair, na terra de Galaad.

⁵ E morreu Iair e foi sepultado en Camón.

Máis infidelidades e opresión dos amonitas

⁶ E volveron os fillos de Israel facer o mal diante do Señor e serviron ós baales e ás axtartés e ós deuses de Siria, ós deuses de Sidón, ós deuses de Moab, ós deuses dos fillos de Amón, e ós deuses dos filisteos; e abandonaron ó Señor e xa non o serviron.

⁷ E acendeuse a ira do Señor contra Israel e entregounos nas mans dos filisteos e nas mans dos fillos de Amón,

⁸ que atribularon e oprimiron durante dezaoito anos a todos os fillos de Israel da outra banda do Xordán, na terra dos amorreos, que está en Galaad.

⁹ E pasaron os fillos de Amón o Xordán, para loitaren tamén contra Xudá, contra Benxamín e contra a casa de Efraím, e angustiaron abondo a Israel.

¹⁰ E clamaron os fillos de Israel ó Señor, dicindo: —"Pecamos contra ti, porque abandonamos o noso Deus e servimos os baales".

¹¹ E dixo o Señor ós fillos de Israel: —"Cando os de Exipto, e os amorreos, os fillos de Amón e os filisteos,

¹² os sidonios, os amalecitas e os madianitas vos oprimiron e clamastes por min, logo non vos salvei eu das súas mans?

¹³ Pero vós abandonástesme e servistes outros deuses. Así que non volverei a salvarvos mais.

¹⁴ Ide e clamade polos deuses que escollestes: que vos salven eles no tempo de vosa anguria".

¹⁵ E dixeron os fillos de Israel ó Señor: —"Pecamos. Podes facer connosco o que mellor che pareza. Soamente che pregamos, por favor, que nos salves neste día".

¹⁶ E retiraron os deuses alleos do medio deles, e serviron ó Señor, que non puido aturar máis os sufrimentos de Israel.

¹⁷ E concentráronse os fillos de Amón e acamparon en Guilgal; e xuntáronse tamén os fillos de Israel e acamparon en Mispah.

¹⁸ E o pobo e os príncipes de Galaad dixeron cada un ó seu compañeiro: —"Quen será o home que comece a loitar contra os fillos de Amón? El será o xefe de todos os veciños de Galaad".