Xosué 16 - Biblia SEPT

A partilla dos fillos de Xosé

¹ E saíu como partilla para os fillos de Xosé, desde o Xordán de Xericó ata as augas de Xericó, polo oriente do deserto, e subía o lindeiro desde Xericó ata a montaña de Betel;

² saía de Betel cara a Luz, pasando por Atarot —lindeiro dos arquitas—,

³ e baixaba polo occidente cara á fronteira dos iafletitas, ata o límite de Bet—Horón de Abaixo e ata Guézer, indo dar ó mar.

⁴ E recibiron a súa partilla os fillos de Xosé (Menaxés e Efraím).

⁵ E foi o lindeiro dos fillos de Efraím, segundo as súas familias, polo oriente, Atarot—Adar, ata Bet—Horón de Arriba,

⁶ e ía dar ó mar, a Micmetat, polo norte; e ía polo leste ata Tanat—Xiloh, pasando por ela ó oriente de Ianohah,

⁷ e baixaba de Ianohah a Atarot e Narat, chegaba a Xericó e saía ó Xordán.

⁸ Desde Zapúah ía o lindeiro cara ó oeste ata o torrente Canah, e saía ó mar. Esta era a herdanza da tribo dos fillos de Efraím, segundo as súas familias.

⁹ E as cidades ciscadas dos fillos de Efraím estaban na herdanza dos fillos de Menaxés: todas as cidades e as súas aldeas.

¹⁰ E non botaron fóra ós cananeos, que habitaron en Guézer, permanecendo no medio de Efraím ata o día de hoxe, pagándolle tributo de servos.