Xosué 12 - Biblia SEPT

Reis vencidos na banda oriental do Xordán

¹ Estes son os reis do país que venceron os fillos de Israel (ocupando a terra deles), na outra banda do Xordán —no oriente—, desde o torrente Arnón ata o monte Hermón e toda a parte oriental da Arabah:

² Sihón, rei dos amorreos, veciño de Hexbón, que dominaba desde Aroer (que está á beira do torrente Arnón), e desde a metade do torrente e a metade de Galaad, ata o torrente Iaboc (a carón dos fillos de Amón),

³ e desde a Arabah ata o Mar de Quinerot (ó oriente) e deica o Mar da Arabah —o Mar do Sal—, polo oriente, no camiño de Bet—Ieximot; e polo sur, a pé de Axdod—Pisgah.

⁴ O territorio de Og, rei do Baxán —un dos últimos descendentes dos Refaím—, veciño de Axtarot e de Edrei.

⁵ Dominaba no monte Hermón, en Salcah e en todo o Baxán, ata o lindeiro dos guexuritas e dos macateos, e na metade de Galaad, ata o lindeiro de Sihón, rei de Hexbón.

⁶ Moisés, servo do Señor, e os fillos de Israel derrotáronos; e Moisés, o servo do Señor, déralles os territorios en herdanza ós rubenitas, ós gaditas e á media tribo de Menaxés.

Reis vencidos na banda occidental do Xordán

⁷ E estes son os reis do país ós que derrotaron Xosué e mais os fillos de Israel, nesta banda do Xordán —na do occidente—, desde Baal—Gad —no val do Líbano—, ata o Monte Rapado, que leva cara a Seir (terras que lles deixou en herdanza Xosué ás tribos de Israel, segundo as súas divisións):

⁸ Na montaña e na Xefelah, na Arabah e nas vertentes, no deserto e no Négueb: os hititas, os amorreos, os cananeos, os perizitas, os hivitas e os iebuseos:

⁹ O Rei de Xericó, un; o rei de Ai —que está a carón de Betel—, un;

¹⁰ o rei de Xerusalén, un; o rei de Hebrón, un;

¹¹ o rei de Iarmut, un; o rei de Láquix, un;

¹² o rei de Eglón, un; o rei de Guézer, un;

¹³ o rei de Debir, un; o rei de Guéder, un;

¹⁴ o rei de Hormah, un; o rei de Arad, un;

¹⁵ o rei de Libnah, un; o rei de Adulam, un;

¹⁶ o rei de Maquedah, un; o rei de Betel, un;

¹⁷ o rei de Zapúah, un; o rei de Héfer, un;

¹⁸ o rei de Afec, un; o rei de Laxarón, un;

¹⁹ o rei de Madón, un; o rei de Hasor, un;

²⁰ o rei de Ximrón—Merón, un; o rei de Acxaf, un;

²¹ o rei de Tanac, un; o rei de Meguido, un;

²² o rei de Quédex, un; o rei de Iocneam —no Carmelo—, un;

²³ o rei de Dor —no outeiro de Dor—, un; o rei dos xentís —en Guilgal—, un;

²⁴ o rei de Tirsah, un. No total, trinta e un reis.