Xoán 14 - Biblia SEPT

Xesús camiño cara ó Pai: 14, 1-14

¹ Non vos agoniedes: crede en Deus e mais crede en min.

² Na casa do meu Pai hai moitas moradas; doutro xeito, teríavos dito que vos ía arranxar un lugar?

³ E cando vaia e vos arranxe un lugar, volverei e collereivos comigo, para que, onde estea eu, esteades vós tamén.

⁴ E a onde eu vou, vós ben sabedes o camiño.

⁵ Dille Tomé: Señor, se non sabemos onde vas, como imos saber o camiño?

⁶ Xesús respondeulle: Eu son o camiño, a verdade e a vida: ninguén chega onda o Pai máis ca por min.

⁷ Se me coñecésedes, coñeceriades tamén a meu Pai; aínda que xa desde agora o coñecedes e o tedes visto.

⁸ Filipe díxolle: Señor, móstranos o Pai e abóndanos.

⁹ Xesús replicoulle: Pero, Filipe, levo tanto tempo convosco e aínda non me coñeces? Quen me viu a min, viu o Pai. Como dis entón "móstranos o Pai"?

¹⁰ Non cres que eu estou no Pai e o Pai en min? As palabras que eu vos digo non as falo pola miña conta; é o Pai, que permanece en min, quen fai as súas obras.

¹¹ Crédeme que eu estou no Pai e o Pai en min. Se non, polo menos crede por esas mesmas obras.

¹² Con toda verdade volo aseguro: quen cre en min, fará el tamén as obras que eu fago, e faraas meirandes aínda, pois estou para irme onda o Pai;

¹³ e o que pidades no meu nome, heino facer, para que o Pai sexa glorificado no Fillo.

¹⁴ Se algo me pedides no meu nome, eu fareino.

A promesa do Espírito: 14, 15-31

¹⁵ Se me amades, gardaredes os meus mandamentos,

¹⁶ e eu rogareille ó Pai, e daravos outro Paráclito para que decote estea convosco:

¹⁷ o Espírito da Verdade. O mundo non o pode acoller, pois non o ve nin o coñece; mais vós coñecédelo, pois permanece onda vós e está en vós.

¹⁸ Non vos deixarei orfos; logo volvo onda vós.

¹⁹ Un pouquiño máis e o mundo xa non me verá; pero vós habédesme ver, que eu vivo e tamén vós habedes vivir.

²⁰ Naquel día coñeceredes que eu estou en meu Pai, e vós en min, e eu en vós.

²¹ Quen ten os meus mandamentos e os garda, ese ámame; o que me ama será amado por meu Pai, e eu amareino e manifestareime a el.

²² Xudas, o outro, non o Iscariote, preguntoulle: Que pasou, para que ti vaias manifestarte a nós e non ó mundo?

²³ Xesús respondeulle: Se alguén me ama, gardará a miña palabra, e meu Pai amarao, e viremos onda el, e faremos vida con el.

²⁴ O que non me ama, non garda as miñas palabras; e a palabra que escoitades de min, non é miña, é do Pai que me mandou.

²⁵ Díxenvos estas cousas mentres estaba convosco;

²⁶ pero o Paráclito, o Espírito Santo que meu Pai mandará no meu nome, ese havos ensinar todo e traeravos á memoria canto eu vos dixen.

²⁷ Déixovos a paz, douvos a miña paz: eu non vola dou coma o mundo a dá. Non vos angustiedes, nin teñades medo.

²⁸ Oístes que vos dixen "voume e logo volvo onda vós". Se me amasedes, alegrariádesvos de que eu vaia onda o Pai, xa que o Pai é máis ca min.

²⁹ Díxenvolo agora, antes de que suceda, para que, cando suceda, creades.

³⁰ Xa non falarei moito convosco, pois está a vir o príncipe deste mundo. Sobre min non ten nada;

³¹ mais é para que saiba o mundo que eu amo ó Pai, e que, coma o Pai me mandou, así fago. Erguede, vámonos de aquí.