Xénese 7 - Biblia SEPT

O diluvio

¹ O Señor díxolle a Noé: —"Entra na arca con toda a túa familia, pois teño visto que ti es o home xusto desta xeración.

² De todo animal puro colle sete parellas, macho e femia; dos non puros, unha parella, macho e femia;

³ dos paxaros, tamén sete parellas, macho e femia, para que se garde viva a especie na terra.

⁴ Dentro de sete días farei chover sobre a terra corenta días seguidos, coas súas noites, e varrerei da face da terra os seres todos que creei".

⁵ Noé fixo todo conforme lle mandara o Señor.

⁶ Tiña seiscentos anos cando veu o diluvio sobre a terra.

⁷ Para se salvar del, entrou na arca cos seus fillos, coa súa muller e coas súas noras.

⁸ Con Noé entraron na arca animais puros e impuros, paxaros e todas as especies de réptiles que hai na terra, por

⁹ parellas, macho e femia, conforme Deus lle mandara.

¹⁰ O cabo de sete días as augas do diluvio alagaban a terra.

¹¹ Noé tiña seiscentos anos, e era o día dezasete do segundo mes, cando se espalancaron as fontes do abismo, en riba do firmamento, e se abriron as comportas do ceo.

¹² Choveu sobre a terra corenta días coas súas noites.

¹³ Nese mesmo día entrou Noé na arca cos seus fillos, Sem, Cam e Iafet, coa súa muller e coas tres noras.

¹⁴ Ademais deles entraron animais de todas as especies, gandos, réptiles, aves, paxaros.

¹⁵ Con Noé entraron na arca parellas de todos os seres con vida,

¹⁶ macho e femia de cada especie, conforme Deus lle mandara. Despois o Señor pechou por fóra.

¹⁷ Durante corenta días caeu un diluvio sobre a terra. As augas, ó encheren, erguían a arca sobre o chan.

¹⁸ Chegaron a medrar tanto, que a arca aboiaba por riba delas.

¹⁹ Subiron máis e máis sobre a terra, ata cubrir las máis altas montañas que hai debaixo do ceo.

²⁰ Cubríanas a feito, rebordando por riba delas quince cóbados.

²¹ Todas as criaturas vivas que se moven na terra pereceron: paxaros, gandos, feras, réptiles e os mesmos homes.

²² Morreu canto tiña alento de vida polo nariz, todo o que hai na terra.

²³ Foron exterminados todos os seres vivos, desde os homes ós gandos, desde os réptiles ós paxaros; todo foi borrado da terra. Quedaron soamente Noé e os que estaban con el na arca.

²⁴ A auga dominou sobre a terra por cento cincuenta días.