Xénese 46 - Biblia SEPT

A familia de Xacob en Exipto

¹ Israel emprendeu a viaxe, con toda a súa xente e as súas posesións. En chegando a Beerxeba, ofreceu un sacrificio ó Deus de seu pai, Isaac.

² Nunha visión, de noite, Deus chamou a Israel: —"Xacob! Xacob!" El respondeu: —"Aquí estou".

³ Díxolle Deus: —"Eu son o Deus de teu pai. Non teñas medo de ires a Exipto, pois alí convertereite nun grande pobo.

⁴ Eu baixarei alá contigo e farei que volvas aquí. Xosé pecharache os ollos".

⁵ Xacob dispúxose logo a saír de Beerxeba. Os fillos montaron a seu pai, os nenos e as mulleres nos carros que lles mandara o faraón para levalos.

⁶ Colleron tamén os gandos e as posesións que adquiriran no país de Canaán, e chegaron a Exipto. Xacob levaba consigo para alá todos os seus descendentes:

⁷ os fillos e os netos, as fillas e as netas, todos os descendentes.

⁸ Estes son os nomes dos fillos de Israel que foron para Exipto: Xacob e mais os seus fillos Rubén, primoxénito de Xacob,

⁹ e os seus fillos: Hanoc, Palú, Hesrón e Carmí.

¹⁰ Simeón e seus fillos: Iemuel, Iamín, Ohad, Iapín, Sohar e Xaúl, fillo da cananea.

¹¹ Leví e seus fillos: Guerxón, Quehat e Merarí.

¹² Xudá e seus fillos: Er, Onán, Xela, Peres e Zérah; Er e Onán morreron en Canaán, e Peres tiña dous fillos: Hesrón e Hamul.

¹³ Isacar e seus fillos: Tolá, Puvah, Iob e Ximrón.

¹⁴ Zebulón e seus fillos: Séred, Elón e Iahleel.

¹⁵ Estes son os fillos que Lea lle deu a Xacob en Padán-Aram, ademais da filla Dinah. Por xunto eran trinta e tres fillos e fillas.

¹⁶ Gad e seus fillos: Sifión, Haguí, Xuní, Esbón, Erí, Arodí e Arelí.

¹⁷ Axer e seus fillos: Iimnah, Ixvah, Ixví, Beriah e Sérah súa irmá; fillos de Beriah: Héber e Malquiel.

¹⁸ Estes son os fillos que lle deu a Xacob Zilpah, a criada que Labán lle dera a Lea súa filla; dezaseis persoas por xunto.

¹⁹ Fillos de Raquel, muller de Xacob: Xosé e Benxamín.

²⁰ A Xosé deulle en Exipto dous fillos Asenat, filla de Potifera, sacerdote de On: Menaxés e Efraím.

²¹ Benxamín e seus fillos: Bela, Béquer, Axbel, Guerá, Naamán, Ehí, Rox, Mupim, Hupim e Ared.

²² Estes son os fillos que Raquel lle deu a Xacob; catorce persoas por xunto.

²³ Dan e seu fillo Huxim.

²⁴ Naftalí e seus fillos: Iahseel, Guní, Iéser e Xilem.

²⁵ Estes son os fillos que lle deu a Xacob Bilhah, a criada que Labán lle dera á súa filla Raquel: sete persoas por xunto.

²⁶ O total das persoas que foron a Exipto con Xacob, todos os seus descendentes, fóra das súas noras, era de sesenta e seis.

²⁷ Cos dous fillos que lle naceron en Exipto a Xosé, a familia de Xacob compúñase alí de setenta persoas.

Encontro de Xacob e Xosé

²⁸ Xacob mandou diante a Xudá para lle dar novas a Xosé de que estaban chegando a Goxén.

²⁹ Xosé mandou enganchar o carro, e saíu para Goxén, ó encontro de Israel seu pai. En véndoo, correu abrazalo, e chorou abrazado a el.

³⁰ Israel díxolle a Xosé: —"Agora podo morrer, despois de que te vin vivo aínda".

³¹ Xosé díxolles a seus irmáns e á familia de seu pai: —"Voulle levar a nova ó faraón: Viñeron onda min meus irmáns e a familia de meu pai, que estaba en Canaán.

³² Son pastores de rabaños, criadores de gando. Trouxeron os seus fatos, os seus gandos, e todo o que tiñan.

³³ Cando vos chame o faraón e vos pregunte: Cál é a vosa profesión?,

³⁴ dirédeslle: Os teus servos son criadores de gando, desde rapaces ata agora; e, coma nós, fórono xa os nosos pais. Dese xeito poderedes asentar na terra de Goxén, pois os exipcios aborrecen os pastores de rabaños".