Xénese 39 - Biblia SEPT

Xosé na casa de Potifar

¹ Os ismaelitas levaron a Xosé para Exipto e vendéronllo ó exipcio Potifar, alto funcionario do faraón, xefe da súa garda.

² O Señor favoreceu a Xosé e deulle boa sorte en todo o que facía na casa do amo exipcio.

³ O seu amo decatouse de que o Señor estaba con el, facendo prosperar todo nas súas mans;

⁴ colleulle afecto a Xosé e gardouno ó seu servizo. Encargoulle o goberno da casa e encomendoulle toda a facenda.

⁵ Desde que lle encomendou a Xosé a súa casa e toda a súa facenda, o Señor bendiciu por causa del a Potifar e acrecentou todo o que tiña, o mesmo na casa coma fóra.

⁶ O exipcio deixouno todo nas súas mans, sen preocuparse persoalmente máis ca da comida. Xosé era fermoso e ben plantado.

Xosé tentado e no cárcere

⁷ Despois de certo tempo, a muller de Potifar pousou os ollos en Xosé e propúxolle: —"Déitate comigo".

⁸ El refugou a proposta, dicindo: —"Ves que o meu amo non se ocupa de cousa ningunha na súa casa, senón que deixou nas miñas mans todo o que ten.

⁹ Ninguén está nesta casa por enriba de min, e o meu amo non se reservou cousa ningunha, fóra de ti mesma, súa muller. Como podería eu cometer un crime semellante, e pecar contra Deus?"

¹⁰ Ela teimaba un día tras outro, mais el non lle facía caso e non se deitou con ela.

¹¹ Un día que entraba el na casa para facer o seu traballo, cando non había alí ningún da casa,

¹² Agarrouse ela ó seu manto, esixíndolle: —"Déitate comigo". El deixou o manto nas mans dela e fuxiu para fóra.

¹³ O verse ela co manto nas súas mans e que el se botara fóra,

¹⁴ chamou ós criados e díxolles: —"Vede, trouxéronos aquí este hebreo para que se aproveitase de nós. Veu onda min coa intención de se deitar comigo; pero eu chamei a berros.

¹⁵ Cando viu que eu chamaba a berros, deixou o manto onda min e fuxiu para fóra".

¹⁶ Ela gardou consigo o manto para, cando viñese á casa o seu home,

¹⁷ volver contarlle todo: —"O servo hebreo que trouxeches, veu onda min e quería aproveitarse de min.

¹⁸ Cando viu que eu chamaba a berros, deixou o manto onda min e fuxiu para fóra".

¹⁹ O que Potifar oíu o que lle dicía a súa muller: —"Isto e isto fíxome o teu servo", enrabechouse moitísimo,

²⁰ e meteu a Xosé no cárcere, onde estaban os presos do rei. Xosé quedou alí encarcerado.

²¹ Mais o Señor estivo con Xosé, mostroulle compaixón, facendo que lle caese ben ó xefe do cárcere.

²² Este encomendoulle os presos que alí había, e facíase todo o que el mandaba.

²³ O xefe do cárcere non controlaba cousa ningunha do que Xosé facía. O Señor estaba con el, e todo o que el facía saía ben.