Xénese 38 - Biblia SEPT

Xudá e Tamar

¹ Por aquel mesmo tempo afastouse Xudá de seus irmáns e foi á casa dun home de Adulam chamado Hirah.

² Alí coñeceu unha muller cananea que se chamaba Xúa; tomouna e achegouse a ela.

³ Xúa quedou embarazada e deulle a Xudá un fillo, a quen puxo o nome de Er.

⁴ Quedou de novo embarazada e deulle outro fillo, ó que chamou Onán.

⁵ Volveu aínda ter un fillo e chamoulle Xelah. A nai atopábase en Quezib cando deu a luz.

⁶ Xudá tomou, co tempo, unha muller para Er, seu primoxénito; chamábase Tamar.

⁷ Er, o primoxénito de Xudá, era un mal home á vista do Señor, e o Señor fíxoo morrer.

⁸ Entón Xudá díxolle a Onán: —"Achégate á muller de teu irmán; cumpre co teu deber de cuñado e dálle descendencia a teu irmán".

⁹ Pero Onán, sabendo que non sería súa a descendencia, vertía o seme polo chan cando se achegaba á muller de seu irmán, para non lle dar descendencia.

¹⁰ Pareceulle mal ó Señor o que Onán facía e fíxoo morrer a el tamén.

¹¹ Xudá díxolle entón á súa nora Tamar: —"Consérvate viúva na casa de teu pai, deica creza o meu fillo Xelah". Pensaba nos seus adentros: —"Non sexa que morra tamén el, coma seus irmáns". E Tamar foi vivir á casa de seu pai.

¹² Moito tempo despois morreu Xúa, muller de Xudá. En acabando o loito por ela, Xudá subiu a Timnah, en compaña de Hirah de Adulam, para a rapa das ovellas.

¹³ Dixéronlle a Tamar: —"Mira que o teu sogro sobe a Timnah, á rapa das ovellas".

¹⁴ Ela quitou a roupa de viúva, cubriu a cara cun veo e, disfrazada, púxose na encrucillada que hai no camiño de Timnah, en Enaim. Pois vía que Xelah medraba, e Xudá non a casaba con el.

¹⁵ O ver Xudá a Tamar, tomouna por unha prostituta, pois tiña a cara cuberta.

¹⁶ Dirixiuse a ela no camiño e propúxolle, sen darse conta de que era a súa nora: —"Ven, deixa que me achegue a ti". Díxolle ela: —"Que me vas dar por achegarte a min?"

¹⁷ El respondeulle: —"Mandareiche un cabuxo do fato". Ela dixo: —"Ben, se me dás un peñor ata que o mandes".

¹⁸ Preguntoulle el: —"Que peñor queres que che dea?" Respondeulle ela: —"O teu anel coa cadea e o caxato que levas na man". El deullos, achegouse a ela, e ela quedou embarazada.

¹⁹ Tamar marchou, quitou o veo da cara e volveu poñer a roupa de viúva.

²⁰ Xudá mandoulle o cabuxo polo seu amigo de Adulam, coa intención de recoller o peñor que tiña a muller; pero aquel non a atopou.

²¹ Preguntou á xente do lugar: —"Onde está a prostituta que se pon en Enaim, á beira do camiño?" Dixéronlle: —"Aí non se pon prostituta ningunha".

²² O home volveu onda Xudá e díxolle: —"Non a encontrei. Por parte, a xente do lugar di que alí non hai ningunha prostituta".

²³ Repuxo Xudá: —"Pois que se quede co peñor; que non se rían de nós. Eu mandeille o cabuxo e ti non a encontraches".

²⁴ O cabo de tres meses dixéronlle a Xudá: —"A túa nora Tamar prostituíuse e quedou embarazada". Dixo Xudá: —"Sacádea fóra e queimádea".

²⁵ Cando a sacaban fóra, mandou ela dicir ó seu sogro: —"O dono destas cousas é quen me deixou embarazada". E engadiu: —"Comproba de quen é este anel coa súa cadea e esta vara".

²⁶ Xudá recoñeceunos e dixo: —"Ten máis razón ca min, pois non lle dei o meu fillo Xelah". Pero non se achegou a ela nunca máis.

²⁷ Chegada a hora do parto, viuse que tiña xemelgos.

²⁸ O dalos á luz, un deles sacou a man para fóra, e a parteira atoulle nela un fío vermello, dicindo: —"Este é o primoxénito".

²⁹ Pero a man volveuse atrás, e saíu primeiro seu irmán. Entón dixo a parteira: —"Que saída te forzaches!" E púxolle o nome de Peres.

³⁰ Despois saíu seu irmán co fío atado na man, e chamárono Zérah.