Xénese 35 - Biblia SEPT

Xacob en Betel

¹ Deus díxolle a Xacob: —"Vai, sube a Betel, asenta alí e fai un altar ó Deus que se che apareceu, cando ías fuxindo de teu irmán Esaú".

² Xacob mandoulles á súa familia e á toda a súa xente: —"Retirade os deuses alleos que teñades, purificádevos e mudádevos de roupa.

³ Imos subir a Betel, para levantar alí un altar ó Deus que me gardou cando eu andaba apurado, e que estivo comigo na viaxe que fixen".

⁴ A xente entregou a Xacob os deuses alleos que tiñan e os brincos que levaban nas orellas, e Xacob enterrounos debaixo do carballo que está onda Xequem.

⁵ En canto se puxeron de camiño, un medo de Deus invadiu todas as vilas do arredor, de xeito que ninguén perseguiu ós fillos de Xacob.

⁶ Xacob chegou a Luz, hoxe Betel, en terra de Canaán, e con el a súa xente.

⁷ Construíu alí un altar, e púxolle ó lugar o nome de Betel, porque se lle apareceu Deus alí, cando fuxía de seu irmán.

⁸ Daquela morreu Déborah, a ama de leite de Rebeca, e enterrárona por baixo de Betel, ó pé do carballo coñecido por carballo do pranto.

A promesa patriarcal

⁹ Deus aparecéuselle a Xacob, á volta de Padán-Aram, bendiciuno

¹⁰ e díxolle: —"O teu nome é Xacob. Pero non seguirás levando o nome de Xacob, senón o nome de Israel". E chamouno Israel.

¹¹ Deus engadiu: —"Eu son o Deus todopoderoso. Ti reprodúcete e medra. De ti sairá un pobo, ou unha chea de pobos, e reis nacerán das túas entrañas.

¹² A terra que eu lle dei a Abraham e a Isaac, doucha tamén a ti e daréillela ós teus descendentes".

¹³ Deus retirouse do lugar onde falara con Xacob.

¹⁴ Xacob erixiu unha estela de pedra no lugar onde Deus lle falara, verteu enriba dela unha libación e unxiuna con óleo.

¹⁵ E púxolle a aquel lugar onde Deus lle falou o nome de Betel.

Morte de Raquel

¹⁶ Xacob saíu coa súa xente de Betel, e cando lles faltaba un treito curto para chegaren a Efrátah, Raquel sentiu que ía dar a luz. O parto resultou moi traballoso.

¹⁷ Nos apuros do parto díxolle a parteira: —"Non teñas medo. Tes un neno".

¹⁸ E ela, saíndoselle a alma, pois estaba morrendo, púxolle ó neno o nome de Fillo da miña dor. Pero seu pai chamoulle Benxamín.

¹⁹ Raquel morreu, e enterrárona no camiño de Efrátah, que é Belén.

²⁰ Enriba do seu sepulcro erixiu Xacob unha estela. É o monumento funerario de Raquel, que existe aínda hoxe.

²¹ Israel marchou de alí e montou as tendas máis alá de Migdal-Éder.

Os fillos de Xacob

²² Estando Israel naquela terra, achegouse Rubén a Bilhah, concubina de seu pai. A cousa chegou a oídos de Israel. Os fillos de Xacob foron doce.

²³ De Lea tivo a Rubén o primoxénito, Simeón, Leví, Xudá, Isacar e Zebulón.

²⁴ De Raquel tivo a Xosé e Benxamín.

²⁵ De Bilhah, serva de Raquel, a Dan e Naftalí;

²⁶ e de Zilpah, serva de Lea, a Gad e Axer. Estes son os fillos que tivo Xacob en Padán-Aram.

Morte de Isaac

²⁷ Xacob chegou á casa de seu pai Isaac, en Mambré, en Quiriat-Arbá, hoxe Hebrón, onde viviran Abraham e Isaac.

²⁸ Isaac viviu cento oitenta anos.

²⁹ A esa idade expirou. Morreu e foise xuntar cos seus, vello e satisfeito de vivir. Enterrárono os seus fillos Esaú e Xacob.