Xénese 34 - Biblia SEPT

Aldraxe a Dinah

¹ Dinah, a filla que Lea lle dera a Xacob, saíu visitar as rapazas do lugar.

² En véndoa Xequem, fillo do hivita Hamor, xefe daquel país, agarrouna, deitouse con ela e violouna.

³ Namorado da filla de Xacob, tolo de amor por ela, faloulle ó corazón.

⁴ Logo díxolle a seu pai Hamor: —"Adquíreme para muller esa rapaza".

⁵ Xacob recibiu a nova da aldraxe de Dinah, súa filla. Pero como os seus fillos estaban no monte co gando, calou ata que viñesen.

⁶ Hamor, o pai de Xequem, foi ver a Xacob para falarlle.

⁷ Os fillos de Xacob volvían entón do monte e oíron o feito. Doéronse e alporizáronse moitísimo de que unha infamia así se cometese contra Israel. Hai cousas que non se fan, como a de violar a filla de Xacob.

⁸ Hamor faloulles deste xeito: —"Meu fillo Xequem namorouse da vosa filla. Dádella, se podedes, por muller.

⁹ Emparentade connosco, dádenos das vosas fillas e vós tomade das nosas.

¹⁰ Podedes facer morada onda nós. A terra está aí, á vosa disposición. Habitade nela, sacádelle proveito, adquiride posesións".

¹¹ Xequem, pola súa parte, díxolles ó pai e ós irmáns de Dinah: —"Que eu mereza o voso favor, e dareivos o que queirades.

¹² Fixade un dote alto, reclamade regalos. Dareivos o que pidades, con tal de que me deades a rapaza por muller".

¹³ Os fillos de Xacob, á vista da aldraxe á irmá, responderon con retranca a Xequem e a seu pai Hamor.

¹⁴ —"Non podemos facer iso de dar a nosa irmá a un home non circuncidado. Sería para nós unha baixeza, cousa deshonrosa.

¹⁵ Poderemos só consentir, coa condición de que vós fagades coma nós, circuncidando todos os varóns.

¹⁶ Entón darémosvos as nosas fillas, e nós tomaremos as vosas. Habitaremos convosco e faremos un mesmo pobo.

¹⁷ Pero se non vos avindes á circuncisión, colleremos a rapaza e irémonos".

¹⁸ A proposta pareceulles ben a Hamor e a seu fillo Xequem.

¹⁹ O mozo Xequem non esperou para cumprir a condición, de namorado que estaba da filla de Xacob. El era o máis respectado da familia de seu pai.

²⁰ Hamor e seu fillo Xequem foron logo á porta da cidade e faláronlles ós xequemitas:

²¹ —"Estes homes son xente de paz. Que habiten na nosa terra, que lle saquen proveito, pois vedes que a terra é abondosa. Nós tomaremos mulleres das súas fillas e darémoslles a eles das nosas.

²² Pero esa xente avirase só a habitar connosco e a facer un mesmo pobo, se circuncidamos todos os varóns, como tamén eles o fan.

²³ As súas facendas, as súas posesións, os seus gandos, serán nosos. Soamente temos que avirnos á súa condición. Entón morarán connosco".

²⁴ Todos os que pasaban polas portas da cidade acollían a proposta de Hamor e do seu fillo Xequem. E circuncidáronse todos os varóns.

Vinganza de Simeón e de Leví

²⁵ Tres días despois de se circuncidaren os xequemitas, doentes aínda da operación, dous dos fillos de Xacob, Simeón e Leví, irmáns de Dinah, colleron as súas espadas, entraron na cidade que se cría segura, e mataron a todos os homes.

²⁶ Mataron tamén a fío de espada a Hamor e ó seu fillo Xequem. Tiraron do pazo a Dinah súa irmá e saíron con ela.

²⁷ Os demais fillos de Xacob botáronse sobre os despoxos e roubaron a cidade onde fora aldraxada súa irmá.

²⁸ Levaron consigo ovellas, vacas, asnos e todo o que había na cidade e nos campos.

²⁹ Colleron como presa os bens, os nenos, as mulleres, roubaron todo o que había nas casas.

³⁰ Xacob díxolles a Simeón e a Leví: —"Botástesme a perder, facéndome noxento para os habitantes desta terra, cananeos e perizitas. Eu teño pouca xente. Se eles se xuntan contra min e me atacan, acabarán comigo e coa miña familia".

³¹ Dixeron eles: —"Habían tratar a nosa irmá coma unha calquera?"