Xénese 26 - Biblia SEPT

Isaac e Abimélec

¹ Houbo fame no país, como outrora en tempos de Abraham, e Isaac foi a Guerar, preto de Abimélec, rei dos filisteos.

² O Señor aparecéuselle e díxolle: —"Non baixes a Exipto. Asenta na terra que eu che mostrarei.

³ Fai nesta terra a túa morada. Eu estarei contigo e bendicireite. A ti e ós teus descendentes dareivos esta terra, para manter o xuramento que fixen a teu pai Abraham.

⁴ Farei crecer os teus descendentes como as estrelas do ceo, dareilles toda esta terra e por eles chamaranse benditas as nacións todas do mundo;

⁵ todo porque Abraham me obedeceu, gardou a miña lei, os meus preceptos e as miñas instrucións".

⁶ Isaac asentou en Guerar.

⁷ A xente do lugar preguntáballe pola súa muller, e el respondía: —"É miña irmá". Tiña medo de confesar que era súa muller, pensando: —"Esta xente vaime matar por culpa de Rebeca". Porque era moi bela.

⁸ Cando levaban xa ben tempo no lugar, Abimélec, rei dos filisteos, ollou pola fiestra e viu a Isaac acariñando a Rebeca súa muller.

⁹ Entón fíxoo chamar para dicirlle: —"Conque é túa muller. Por que me dixeches que era túa irmá?" Isaac respondeulle: —"Porque pensei: Vanme matar por culpa dela".

¹⁰ Abimélec replicou: —"Por que nos fixeches isto? Se chega a deitarse alguén coa túa muller, faríasnos reos dun delito".

¹¹ Abimélec advertiu a toda a súa xente: —"Se alguén lle toca a este home ou á súa muller, será reo de morte".

Prosperidade de Isaac

¹² Isaac sementou o agro e recolleu naquela anada o cento por un. O Señor bendiciuno,

¹³ e o home foi medrando, ata se facer moi podente.

¹⁴ Tiña fatos de ovellas e de vacas e moitísimos criados. Os filisteos tíñanlle envexa,

¹⁵ e encheron de terra e cegaron os pozos que abriran os criados de seu pai Abraham.

¹⁶ Abimélec díxolle a Isaac: —"Marcha de onda nós, pois ti es moito máis forte".

¹⁷ Isaac marchou de alí, parou no val de Guerar e alí asentou.

¹⁸ Abriu de novo os pozos que foran xa cavados en vida de seu pai Abraham e que despois da súa morte cegaran os filisteos, e púxolles os mesmos nomes que lles puxera seu pai.

¹⁹ Os criados de Isaac cavaron tamén no torrente e deron cun manancial.

²⁰ Os pastores de Guerar rifaron cos de Isaac dicindo: —"A auga é nosa". Por culpa desa discusión puxéronlle ó pozo o nome de Contenda.

²¹ Despois cavaron outro pozo e rifaron tamén por el. Chamáronlle, por iso, Inimizade.

²² Isaac foise de alí e fixo abrir outro pozo. Por este non houbo discusión, e púxolle Rehobot, pensando: —"Agora dános largueza o Señor para que prosperemos nesta terra".

²³ De alí subiu Isaac ata Beerxeba.

²⁴ Aquela mesma noite aparecéuselle o Señor e díxolle: —"Eu son o Deus de teu pai Abraham. Non teñas medo, pois eu estou contigo. Bendicireite e aumentarei a túa descendencia, por mor do meu servo Abraham".

²⁵ Isaac construíu alí un altar e invocou o nome do Señor. Montou a súa tenda, e os seus criados abriron un pozo alí mesmo.

Pacto de Isaac con Abimélec

²⁶ Abimélec chegouse onda Isaac desde Guerar, con Ahuzat o seu amigo e con Picol xefe da súa xente.

²⁷ Isaac preguntoulles: —"A que vindes onda min, vós que me aborrecestes e me botastes da vosa compaña?"

²⁸ Respondéronlle eles: —"Acabamos por ver que o Señor está contigo. Queremos que haxa entre nós un compromiso, que establezamos un pacto.

²⁹ Ti non nos farás mal, como non te tocamos tampouco nós a ti. Tratámoste sempre ben e démosche unha boa despedida. E agora ti es o bendito do Señor".

³⁰ Isaac preparoulles un xantar, e comeron e beberon.

³¹ Erguéronse de mañá e intercambiaron xuramentos. Despois Isaac despediunos, e eles fóronse en paz.

³² O mesmo día chegaron os criados de Isaac para o informaren do pozo que estaban abrindo; dixéronlle: —"Atopamos auga".

³³ El púxolle o nome de Xeba. De aí o nome da cidade de Beerxeba ata hoxe.

As mulleres de Esaú

³⁴ Cando Esaú tiña corenta anos, tomou por mulleres a Xudit, filla de Beerí o hitita, e a Basmat, filla de Elón, tamén hitita.

³⁵ Foron razón de tristura para Isaac e para Rebeca.