Xénese 22 - Biblia SEPT

O sacrificio de Isaac

¹ Despois destes feitos, Deus puxo á proba a Abraham, chamándoo: —"Abraham!" El respondeu: —"Aquí estou".

² Deus mandoulle: —"Colle o teu fillo, o único que tes e que tanto queres, Isaac, e vaite ó país de Moriah. Alí ofrecerasmo en sacrificio, no cimo dunha das montañas que eu che mostrarei".

³ Abraham ergueuse cedo, aparellou o burro e tomou consigo dous criados e mais o seu fillo Isaac. Coa leña cortada para o sacrificio, púxose ó camiño en dirección do lugar que Deus lle indicara.

⁴ O terceiro día Abraham ergueu os ollos e viu o sitio desde lonxe.

⁵ Abraham díxolles ós criados: —"Esperade aquí co burro. Eu e mais o rapaz chegarémonos ata alá. Adoraremos e de seguida volveremos onda vós".

⁶ Abraham colleu a leña do sacrificio e púxolla a Isaac, seu fillo, ás costas. Tomou na man o lume e o coitelo, e camiñaban os dous xuntos.

⁷ Isaac díxolle a seu pai: —"Meu pai!" El respondeu: —"Que queres, fillo?" O rapaz dixo: —"Levamos lume e leña. Pero onde está o año para o sacrificio?"

⁸ Abraham respondeulle: —"Meu fillo, o año Deus o proverá". E camiñaban os dous xuntos.

⁹ Chegados ó lugar que Deus dixera, Abraham construíu un altar, puxo enriba del a leña, atou o seu fillo Isaac e deitouno no altar, por enriba da leña.

¹⁰ Despois tendeu a man e agarrou o coitelo para sacrificar o seu fillo.

¹¹ Mais o anxo do Señor chamou desde o ceo: —"Abraham! Abraham!" El respondeu: —"Aquí estou".

¹² O anxo dixo: —"Non poñas a man no rapaz nin lle fagas mal ningún. Agora dei comprobado que tes temor de Deus, pois non me negaches o teu fillo, o único que tes".

¹³ Abraham ergueu os ollos e viu un carneiro atrapado nunha silveira polos cornos. Botou man del e ofreceuno en sacrificio, no posto do seu fillo.

¹⁴ Abraham púxolle ó lugar o nome de Moriah. Por iso aínda hoxe se di: —"Na montaña o Señor proverá".

Renovación da promesa

¹⁵ O anxo do Señor chamou a Abraham outra vez desde o ceo:

¹⁶ —"Xúroche por min mesmo —palabra do Señor— que por faceres isto e non me negares o teu fillo, o único que tes,

¹⁷ bendicireite e farei crecer os teus descendentes coma as estrelas do ceo e as areas do mar. Os teus descendentes herdarán as cidades dos inimigos.

¹⁸ Todos os pobos da terra terán bendición na túa descendencia, por me teres ti obedecido".

¹⁹ Abraham volveu onda os criados, e todos xuntos colleron o camiño de Beerxeba. Abraham asentou alí.

A familia de Nahor

²⁰ Pasado algún tempo, dixéronlle a Abraham: —"Tamén Milcah lle deu fillos a Nahor, teu irmán.

²¹ Deulle a Us, o primoxénito, despois a Buz, seu irmán, e a Quemuel, pai de Aram;

²² os outros logo foron Quésed, Hazó, Pildax, Idlaf e Betuel".

²³ Betuel foi pai de Rebeca. Estes son os oito fillos que Milcah lle deu a Nahor, irmán de Abraham.

²⁴ Unha concubina chamada Reumah deulle, ademais, a Tebah, a Gaham, a Tahax e a Maacah.