Xénese 17 - Biblia SEPT

Alianza de Deus con Abraham

¹ Abram tiña noventa e nove anos, cando se lle apareceu o Señor para lle dicir: —"Eu son o Deus Xadai. Camiña de acordo comigo e se perfecto.

² Eu establezo entre nós os dous unha alianza. Fareite crecer moito".

³ Abram prostrouse por terra, e Deus díxolle:

⁴ —"Esta é a alianza que eu fago contigo: Serás pai de moitos pobos.

⁵ Non te seguirás chamando Abram; o teu nome será Abraham, porque te fago pai de moitos pobos.

⁶ Dareiche fecundidade, sacarei de ti nacións, de ti sairán reis.

⁷ Establezo a miña alianza, alianza perpetua, contigo e cos teus descendentes, polas xeracións vindeiras. Eu serei o teu Deus e o dos teus descendentes.

⁸ Dareiche a ti e a eles, en posesión perpetua, a terra onde habitas, o país de Canaán. Eu serei o teu Deus".

A circuncisión

⁹ Deus díxolle a Abraham: —"Gardarás a miña alianza, ti e mais os teus descendentes, polas xeracións vindeiras.

¹⁰ Esta é a alianza que eu fago contigo e cos teus descendentes, e que habedes de gardar:

¹¹ Circuncidade a pel do prepucio, en sinal de alianza entre nós.

¹² Os oito días de nacer, circuncidade todos os varóns, unha xeración tras outra, o mesmo os nacidos na casa, coma os forasteiros adquiridos por diñeiro, que non son descendentes teus.

¹³ Circuncidade os nacidos na casa e os adquiridos por diñeiro, e a miña alianza estará no voso corpo como alianza perpetua.

¹⁴ O varón non circuncidado, coa pel do prepucio sen cortar, será el cortado do seu pobo, pois viola a miña alianza".

Un fillo de Sara

¹⁵ O Señor díxolle a Abraham: —"A túa muller non seguirá chamándose Sarai. O seu nome é Sara.

¹⁶ Bendicireina e dareiche un fillo dela; bendicireina e será nai de nacións, nacerán dela reis de pobos".

¹⁷ Abraham prostrouse por terra e sorriu, pensando para si: —"Un home de cen anos terá un fillo, e Sara ós seus noventa parirá!"

¹⁸ E suplicoulle a Deus: —"Oxalá deixes vivir a Ismael!"

¹⁹ Deus respondeulle: —"Non; Sara, a túa muller, darache un fillo, e poraslle o nome de Isaac. Con el e cos seus descendentes vindeiros establezo unha alianza, alianza perpetua.

²⁰ En canto a Ismael, tamén te escoitarei. Bendicireino, dareille fecundidade e fareino crecer moito. Xerará doce príncipes e convertereino nun gran pobo.

²¹ Pero a miña alianza establecereina con Isaac, o fillo que che dará Sara de hoxe nun ano".

²² En acabando de falar, Deus foise de onda Abraham.

²³ Abraham colleu o seu fillo Ismael, os servos todos nacidos na súa casa e os adquiridos por diñeiro, todo varón da súa casa, e circuncidou ese mesmo día a pel dos seus prepucios, conforme Deus lle mandara.

²⁴ Abraham tiña noventa e nove anos cando circuncidou a pel do seu prepucio,

²⁵ e Ismael tiña trece.

²⁶ No mesmo día circuncidouse Abraham e seu fillo Ismael.

²⁷ Con eles circuncidáronse tamén todos os varóns da súa casa, o mesmo os nacidos nela coma os adquiridos por diñeiro.