Xénese 15 - Biblia SEPT

Alianza de Abraham

¹ Despois disto Abram oíu en visión palabra do Señor: —"Non teñas medo, Abram. Eu son para ti un escudo. O teu pago será moi grande".

² Abram preguntou: —"Señor e dono meu, que me darás, se vou morrer sen fillos, e o damasceno Eliézer será o meu herdeiro?"

³ E insistiu: —"Mira que non me deches descendencia e que un criado da casa será o meu herdeiro".

⁴ O Señor respondeulle: —"Non será ese o teu herdeiro. Será un fillo teu".

⁵ Logo levouno fóra e prometeulle: —"Olla cara ó ceo e conta as estrelas, se é que podes. Así terás de descendentes".

⁶ Abram creu ó Señor, que llo tivo en conta para a xustificación.

⁷ Despois díxolle o Señor: —"Eu son o Señor, que te sacou de Ur dos Caldeos, para che dar en herdo esta terra".

⁸ Abram preguntou: —"Señor e dono meu, como saberei que será miña?"

⁹ O Señor respondeu: —"Tráeme unha becerra, unha cabra e un carneiro, todos eles de tres anos, e mais unha rula e unha pomba".

¹⁰ Abram trouxo todo, partiu os animais polo medio e puxo unha metade fronte á outra; pero as aves non as partiu.

¹¹ Os voitres descendían á carnada, e Abram espantábaos.

¹² Cando o sol estaba para se pór, apoderouse de Abram un sono profundo e invadiuno unha escura ansiedade.

¹³ Entón díxolle o Señor: —"Saberás que os teus descendentes terán que estar coma forasteiros nunha terra allea, e que os escravizarán e os oprimirán por catrocentos anos.

¹⁴ Pero has de saber tamén que eu castigarei ó pobo que os escravice, e despois eles sairán con moitos bens.

¹⁵ Ti irás xuntarte en paz con teus pais; serás enterrado ó cabo dunha boa vellez.

¹⁶ Despois de catro xeracións volverán eles aquí, pois aínda non chegou ó seu cúmulo a maldade dos amorreos".

¹⁷ Cando se puxo o sol e se fixo noite pecha, Abram viu pasar entre os membros dos animais tallados un fume coma de forno e un facho de lume.

¹⁸ Aquel día fixo o Señor con Abram esta alianza: —"Os teus descendentes dareilles esta terra, desde o torrente de Exipto ata o gran río Éufrates,

¹⁹ As terras dos Quenitas, dos Quenizitas, dos Cadmoneos,

²⁰ dos Hititas, dos Perizitas, dos Refaítas,

²¹ dos Amorreos, dos Cananeos, dos Guigarxitas e dos Iebuseos".