Tito 2 - Biblia SEPT

Ensino san e seguro

¹ Pola túa parte, ensina o que é conforme á boa doutrina.

² Que os vellos sexan sobrios, serios, prudentes, sans na fe, na caridade, na paciencia.

³ As vellas o mesmo: que sexan honestas no coidado da súa compostura, nin lingoreteiras, nin moi amigas do viño, mestras do ben,

⁴ para que exhorten ás novas a quereren ós seus homes e ós seus fillos,

⁵ Asisadas, limpas, boas administradoras da casa, submisas ós seus propios homes, para non desprestixiar a palabra de Deus.

⁶ Exhorta tamén ós novos a seren asisados,

⁷ mostrándote ti mesmo en todo coma exemplo de boa conduta: incorrupto na doutrina e serio.

⁸ Ensina unha palabra sa e indiscutible, para que o contrario se avergonce, non tendo nada malo que dicir de nós.

⁹ Que os escravos se lles sometan en todo ós seus amos e sexan servizais e non respondóns,

¹⁰ nin rapineiros; ó contrario, que sexan plenamente fieis e honrados, para faceren honor á doutrina de Deus, o noso Salvador.

¹¹ Porque a graza de Deus viuse que era fonte de salvación para todos os homes.

¹² Ela ensínanos que reneguemos da impiedade e das cobizas mundanas e vivamos no mundo presente dun xeito asisado, xusto e respectuoso,

¹³ Agardando a bendita esperanza e a manifestación gloriosa do noso gran Deus e Salvador Xesús Cristo.

¹⁴ El entregouse por nós, para nos redimir de toda iniquidade e purificar para si un pobo escolleito, afervoado, dedicado ás boas obras.

¹⁵ Di estas cousas, exhorta e reprende con toda autoridade; que ninguén te desprece.