Salmos 94 - Biblia SEPT

(93) O pago dos soberbios

¹ Señor, Deus xusticeiro, Deus xusticeiro, maniféstate;

² xuíz da terra, érguete, dálles o seu pago ós soberbios.

³ Ata que día os malvados, Señor, ata que día os malvados triunfarán?

⁴ Os malfeitores latrican, falan con insolencia e xactancia.

⁵ Oprimen, Señor, o teu pobo, asoballan o teu herdo;

⁶ matan viúvas e estranxeiros, asasinan orfos.

⁷ Din: —"O Señor non o ve, o Deus de Xacob non se decata".

⁸ Entendede, xente insensata, cando teredes xuízo, ignorantes?

⁹ Non vai oír quen plantou o oído? Non vai ver quen fixo os ollos?

¹⁰ Non vai castigar quen educa os pobos e ensina a ciencia ós humanos?

¹¹ O Señor coñece ben as ideas dos homes: verdadeira vaidade.

¹² Feliz o que ti corrixes, Señor, e lle ensinas a túa vontade.

¹³ Despois das horas malas dáslle o sosego, mentres para os malvados se cava unha cova.

¹⁴ Certamente o Señor non rexeita o seu pobo nin abandona o seu herdo.

¹⁵ O xuízo será outra vez xusto e todos os rectos o gardarán.

¹⁶ Quen se erguerá por min contra os malvados? Quen me axudará en contra dos malfeitores?

¹⁷ Se o Señor non me acorrese, xa estaría morando no silencio da morte.

¹⁸ Cando digo: —"O meu pé tremelica", o teu amor, Señor, sostenme.

¹⁹ Cando medran as coitas no meu peito, o teu consolo alégrame o espírito.

²⁰ Pode ser aliado teu o tribunal inxusto, que no nome da lei amaña a opresión?

²¹ Asaltan a vida dos rectos e condenan os inocentes.

²² Pero o Señor é o meu refuxio, o meu Deus, a rocha onde me acollo.

²³ El pagaralles a súa iniquidade, destruiraos na súa mesma maldade, destruiraos o Señor, noso Deus.