Salmos 93 - Biblia SEPT

(92) Reina o Señor

¹ Reina o Señor, vestido de maxestade, o Señor está vestido, cinguido de poder, e o mundo non abanea, está firme.

² O teu asento está afincado desde sempre, ti estás aí desde a eternidade.

³ As correntes erguen, Señor, as correntes erguen a súa voz, as correntes erguen o seu fragor.

⁴ Pero, máis cá voz das moitas augas, máis podente cás ondas do mar é potente nas alturas o Señor.

⁵ A revelación do Señor é verdadeira, a santidade é o ornato da túa casa, polos séculos, Señor.