Salmos 92 - Biblia SEPT

(91) Os xustos medrarán

¹ Salmo, cántiga, para o sábado.

² É bo loarte, Señor, cantar o teu nome, Altísimo,

³ pregoar de mañá o teu amor e de noite a túa fidelidade,

⁴ ó son da arpa e da lira, coas soantes cordas da cítola.

⁵ As túas obras, Señor, danme alegría, as accións das túas mans fanme cantar;

⁶ os teus feitos, Señor, que grandes son! Que profundos os teus proxectos!

⁷ O ignorante non o sabe, o parvo non o entende.

⁸ Se medran os malfeitores coma a herba, se os malvados florecen, serán destruídos para sempre,

⁹ mentres ti, Señor, es eternamente excelso.

¹⁰ Aí están, Señor, os teus inimigos, aí están os teus inimigos perecendo e dispersos os malfeitores.

¹¹ Mais a min dásme a forza dun touro e únxesme con óleo fresco.

¹² Cos meus ollos verei a ruína do opresor, cos meus oídos a dos meus inxustos agresores.

¹³ Os xustos medrarán coma palmeiras, ergueranse coma cedros do Líbano.

¹⁴ Plantados na casa do Señor, florecerán nos adros do noso Deus.

¹⁵ Aínda na vellez seguirán dando froito, estarán fortes e frescos,

¹⁶ para pregoar que recto é o Señor, a miña rocha, en quen non hai iniquidade.