Salmos 91 - Biblia SEPT

(90) Nas palmas das mans

¹ O que habita ó agarimo do Altísimo e mora á sombra do Omnipotente,

² dígalle ó Señor: —"Meu refuxio, miña forza, meu Deus, en quen confío".

³ El é quen te libra do lazo do cazador e da peste maligna.

⁴ Cóbrete coas súas plumas, protéxete coas súas ás, escóndete co seu brazo e deféndete.

⁵ Non temerás as sorpresas da noite nin as frechas que voan polo día,

⁶ nin a peste que rolda nas tebras nin o andazo que estraga ó mediodía.

⁷ Se ó teu lado caen mil, e dez mil á túa dereita, a ti non te tocará.

⁸ Só con abrir os ollos, verás o pago dos malvados.

⁹ Abofé o Señor é o teu refuxio, tes no Altísimo a defensa.

¹⁰ Ningún mal non te tocará, ningunha praga non se achegará á túa tenda.

¹¹ Pois El manda os seus anxos para que te garden en todos os camiños.

¹² Levarante nas palmas das mans, para que non batan nas pedras os teus pés.

¹³ Esmagarás áspides e serpes, calcarás leóns e dragóns.

¹⁴ Xa que me ten afecto, librareino, poreino en seguro, xa que coñece o meu nome.

¹⁵ Chamarame, e respondereille, estarei con el nos apuros, defendereino e honrareino.

¹⁶ Dareille días a fartar, mostrareille a miña salvación.