Salmos 89 - Biblia SEPT

(88) O pacto co rei unxido

¹ Poema de Etán o indíxena.

² Quero cantar por sempre o amor do Señor, pregoar polas xeracións a súa fidelidade:

³ —"Penso que o teu amor está fundado co mundo, a túa fidelidade asentada cos ceos".

⁴ Co meu elixido firmo unha alianza, ó meu servo David fágolle un xuramento:

⁵ —"Afincarei a túa liñaxe para sempre, construireiche un trono duradeiro".

⁶ Os ceos proclaman, Señor, as túas marabillas, a asemblea dos santos, a túa fidelidade.

⁷ Quen, sobre as nubes, se compararía co Señor? Quen lle semella entre os seres divinos?

⁸ Deus no consello dos santos é temido, grande e terrible para canto o rodea.

⁹ Señor, Deus dos exércitos, quen hai coma ti, cinguido, Señor, de poder e fidelidade?

¹⁰ Ti dominas a soberbia do mar, acalas s ondas levantadas.

¹¹ Ti esmagas a Rahab coma un cadáver e desbaratas con brazo poderoso os teus inimigos.

¹² Teu é o ceo e túa a terra, o mundo e canto o enche ti o fundaches.

¹³ Ti creaches o norte e o sur, o Tabor e o Hermón exultan no teu nome.

¹⁴ Ti tes brazo potente, a túa man é forte, a túa dereita ergueita.

¹⁵ Xustiza e rectitude fundamentan o teu trono, amor e fidelidade marchan ante ti.

¹⁶ Feliz o pobo que sabe aclamarte e camiñar, Señor, na luz da túa presenza.

¹⁷ O teu nome fai a súa ledicia o día enteiro, a túa xustiza é a súa gloria.

¹⁸ Ti es, en verdade, a súa gloria e a súa forza, polo teu favor erguemos nós a testa.

¹⁹ O Señor é o noso escudo, o santo de Israel o noso rei.

²⁰ Un día falaches así en visión ós teus amigos: —"Púxenlle a coroa a un valente, erguín do medio do pobo un elixido;

²¹ Atopei o meu servo David e unxino con óleo santo.

²² A miña rexa man estará con el, o meu brazo farao forte.

²³ Non poderán con el os inimigos nin o abaterán os malvados.

²⁴ Eu desfarei ante el os meus adversarios, ferirei ós que me aborrecen.

²⁵ A miña fidelidade e o meu amor irán con el e no meu nome erguerá a testa.

²⁶ Estenderei sobre o mar a súa man, sobre os ríos a súa dereita.

²⁷ El dirame: —Ti es meu pai, meu Deus, rocha da miña salvación.

²⁸ Eu dareille a primoxenitura, a soberanía sobre os reis da terra.

²⁹ Gardareille o meu amor eternamente e a miña alianza con el será leal.

³⁰ Dareille unha posteridade duradeira, o seu trono sosterase coma os ceos.

³¹ Se os seus fillos abandonan a miña lei e non se rexen polas miñas decisións;

³² se profanan os meus mandatos e non gardan os meus preceptos,

³³ eu fustrigarei coa vara os seus delitos e con azoutes as súas culpas.

³⁴ Pero non lles retirarei o meu amor nin faltarei á miña fidelidade;

³⁵ non violarei a miña alianza nin mudarei o dito dos meus labios.

³⁶ Unha vez xurei pola miña santidade que non mentiría a David.

³⁷ A súa posteridade será eterna, o seu reino durará coma o sol ante min,

³⁸ coma a lúa, que está firme por sempre, signo fiel no alto do ceo".

³⁹ Pero ti rexeitáchelo, desdeñáchelo, incomodácheste co teu unxido;

⁴⁰ rompiches a alianza co teu servo, profanaches polo chan a súa coroa.

⁴¹ Derrubaches os seus muros, convertícheslle en ruína as fortalezas.

⁴² Os que pasan saquéano, é o riso dos veciños.

⁴³ Erguiches a man dos seus adversarios, alegraches ós seus inimigos.

⁴⁴ Gafáches o fío da súa espada e non o sostiveches na batalla.

⁴⁵ Tiráchelo do seu esplendor, botaches por terra o seu trono.

⁴⁶ Acurtaches os días da súa mocidade, cubríchelo de ignominia.

⁴⁷ Por canto tempo aínda, Señor? Esconderaste para sempre? Arderá coma lume o teu furor?

⁴⁸ Recorda cal é a miña duración e que caducos creaches os homes.

⁴⁹ Que home vivirá sen ver a morte? Quen librará a súa vida das poutas do abismo?

⁵⁰ Onde está, Señor, o antigo amor que pola túa fidelidade lle xuraches a David?

⁵¹ Ten en conta, Señor, a aldraxe dos teus servos, o que teñen que aturar de todas as nacións;

⁵² os insultos, Señor, dos teus inimigos, os insultos ós pasos do teu Unxido.

⁵³ Bendito sexa por sempre o Señor. Amén. Amén.