Salmos 85 - Biblia SEPT

(84) Ti es bo coa túa terra

¹ Do mestre do coro. Dos coreítas. Salmo.

² Señor, ti es bo coa túa terra, ti restauras a sorte de Xacob.

³ Ti perdoas as culpas do teu pobo, ti cobres os seus pecados.

⁴ Ti reprimes a túa ira e arredas o ardente noxo.

⁵ Restáuranos, Deus, noso salvador, depón a túa indignación contra nós.

⁶ Vas estar enfadado connosco para sempre? Vas manter a túa ira polas xeracións?

⁷ Non volverás xa a darnos vida e que poida o teu pobo alegrarse contigo?

⁸ Móstranos, Señor, o teu amor, dános a túa salvación.

⁹ Escoitarei o que di o noso Deus: certamente o Señor fala de paz para o seu pobo e os seus amigos, para aqueles que se converten e confían.

¹⁰ A salvación está xa preto dos que o temen, a súa gloria habitará na nosa terra.

¹¹ O amor e a fidelidade atoparanse, abrazaranse a xustiza e mais a paz.

¹² Na terra xermolará a fidelidade, a xustiza ollará desde o ceo.

¹³ O mesmo Señor dará os bens, a nosa terra dará os froitos.

¹⁴ A xustiza irá diante del, guiará os seus pés no camiño.