Salmos 83 - Biblia SEPT

(82) Os pobos en conxura

¹ Cántiga, salmo de Asaf.

² Señor, non quedes calado, non esteas, Deus, mudo e quedo.

³ Mira que os teus inimigos se reviran, os que te aborrecen erguen a cabeza.

⁴ Traman un proxecto en contra do teu pobo, conspiran contra os teus protexidos.

⁵ "Vide —din—; borrémolo de entre os pobos que non se recorde máis o nome de Israel".

⁶ Están de acordo na conxura, entran no pacto contra ti

⁷ As cabilas de Edom e de Ismael, moabitas e agarenos,

⁸ Guebal, Amón e Amalec, filisteos e mais tirios;

⁹ tamén os acompañan os asirios, axudando ós fillos de Lot.

¹⁰ Failles coma a Madián e coma a Sísera, coma a Iabín no torrente Quixón:

¹¹ foron destruídos en Endor e ficaron coma esterco dos campos.

¹² Trata ós seus xefes coma a Oreb e a Zeeb, ós seus nobres coma a Zébah e Salmuná,

¹³ que dicían: —"Conquistemos as terras de Deus".

¹⁴ Convérteos, meu Deus, en folla seca, en cisco diante do vento.

¹⁵ Coma lume que queima os bosques, coma fogueira que abura os montes,

¹⁶ persígueos así coa tempestade, atérraos co furacán.

¹⁷ Fártaos de vergonza, ata que invoquen, Señor, o teu nome.

¹⁸ Queden avergonzados, enteiramente abatidos, que se vexan perdidos e confusos.

¹⁹ Que aprendan que só ti, Señor, es o Altísimo en toda a terra.