Salmos 82 - Biblia SEPT

(81) Facede xustiza ós pobres

1 Salmo de Asaf.

¹ Salmo de Asaf. Deus érguese no concello divino, fai xuízo na xunta dos deuses.

² Por canto tempo aínda xulgaredes inxustamente favorecendo a causa dos malvados?

³ Facede xustiza ós pobres e ós orfos, dade o seu dereito ós humildes e ós pobres,

⁴ rescatade ós pobres e oprimidos, librádeos da man dos malvados.

⁵ Eles non saben nin entenden; camiñan ás escuras, mentres o mundo treme desde os alicerces.

⁶ Eu dixera: —"Sodes deuses, fillos todos do Altísimo;

⁷ pero morreredes coma os homes, caeredes o mesmo cós tiranos".

⁸ Érguete, Deus, goberna ti a terra, pois todos os pobos che pertencen.