Salmos 80 - Biblia SEPT

(79) Móstrate e seremos salvos

¹ Do mestre do coro, con cítaras de Xuxán. Edut, salmo de Asaf.

² Escoita, pastor de Israel, que guías o rabaño de Xosé; ti que sentas sobre os querubíns,

³ móstrate ante Efraím, Benxamín e Menaxés, esperta o teu poder e ven salvarnos.

⁴ Restáuranos, Deus; móstrate e seremos salvos.

⁵ Señor, Deus dos exércitos, por canto tempo aínda estarás irritado contra os rogos do teu pobo?

⁶ Décheslle a comer un pan de pranto e a beber bágoas a grolos.

⁷ Puxéchesnos de rifa entre veciños e búrlanse de nós os nosos inimigos.

⁸ Restáuranos, Deus dos exércitos; móstrate, e seremos salvos.

⁹ Arrincaches de Exipto unha vide, expulsaches nacións para a plantar;

¹⁰ preparácheslle o chan, botou raíces, encheu a terra.

¹¹ A súa sombra cubría os montes, os seus bacelos eran coma cedros;

¹² estendeu as súas ramas ata o mar os seus gromos ata o río.

¹³ Por que lle derrubaches os valados, para que a vendimen cantos pasan?

¹⁴ Os xabarís estragan nela e devórana as bestas do campo.

¹⁵ Dá a volta, Deus dos exércitos, olla desde o ceo e ve. Atende esta vide,

¹⁶ este bacelo que plantaches coa túa man, o bacelo que ti fortaleciches.

¹⁷ Queimárono, chapodárono: perezan ante o furor da túa presenza.

¹⁸ Que a túa man protexa ó teu elixido, o home que ti fortaleciches.

¹⁹ Non nos afastaremos máis de ti; dános vida de novo, e invocaremos o teu nome.

²⁰ Restáuranos, Señor dos exércitos; móstrate e seremos salvos.