Salmos 8 - Biblia SEPT

Canto ó creador do home

¹ Do mestre do coro, coa cítara de Gat. Salmo de David.

² Señor, noso Señor, que grande é o teu nome en toda a terra! A túa maxestade érguese por enriba do ceo.

³ Na boca de nenos de peito fundas a túa fortaleza contra os teus adversarios, para faceres calar a inimigos e rebeldes.

⁴ Cando vexo o ceo, feitura da túa man, a lúa e as estrelas que fixaches alí,

⁵ que é o home, para que o lembres, o fillo do home, para que del te ocupes?

⁶ Por pouco non o fixeches coma os anxos, coroáchelo de honor e dignidade;

⁷ décheslle mando sobre as obras das túas mans, puxéchelo todo ós seus pés:

⁸ rabaños de ovellas e touros, e mesmo as bestas do monte,

⁹ os paxaros do ceo e os peixes do mar, que fan carreiros polas augas.

¹⁰ Señor, noso Señor, que grande é o teu nome en toda a terra!