Salmos 76 - Biblia SEPT

(75) Para salvar os oprimidos

¹ Do mestre do coro, con instrumentos de corda. Salmo de Asaf, cántiga.

² Deus é coñecido en Xudá, en Israel é grande o seu nome.

³ Ten a súa tenda en Xalem e a súa morada en Sión.

⁴ Alí rompe o arco flamexante, o escudo, a espada e as guerras.

⁵ Ti es resplandecente, poderoso, dono de montañas de botín.

⁶ Os valentes son espoliados mentres dormen; ós guerreiros non lles responden as súas mans.

⁷ Ante a túa ameaza, Deus de Israel, paralízanse carros e cabalos.

⁸ Ti, Señor, es temible, quen resistiría ante ti, ante a forza da túa ira?

⁹ Desde o ceo pronuncias sentencia, treme a terra e cala.

¹⁰ Cando te ergues, Deus, para xulgar, para salvar os oprimidos da terra,

¹¹ A carraxe humana proclama a túa gloria e os salvados da túa ira serán a túa coroa.

¹² Facede votos ó Señor voso Deus, e cumprídeos e que os pobos do arredor traian tributo ó terrible,

¹³ o que lles corta ós príncipes o folgo, que é terrible para os reis da terra.