Salmos 66 - Biblia SEPT

(65) Aclama a Deus, terra enteira

1 Do mestre do coro, cántiga, salmo.

¹ Do mestre do coro, cántiga, salmo. Aclama a Deus, terra enteira,

² canta a gloria do seu nome; réndelle o honor da loanza,

³ dille: Que sorprendentes son as túas obras! polo teu moito poder adúlante os teus inimigos,

⁴ póstrase a terra toda ante ti e canta salmos ó teu nome.

⁵ Vinde e vede as obras do Señor, os seus sorprendentes feitos entre os homes.

⁶ El mudou o mar en terra seca e pasaron o río a pé: felicitémonos por iso.

⁷ Co seu poder domina o mundo, cos seus ollos observa as xentes: que non ensoberbezan os rebeldes.

⁸ Bendicide, nacións, o noso Deus, facede resoar a súa loanza:

⁹ El salva as nosas vidas e non deixa cambalear os nosos pés.

¹⁰ Mais ti, Deus, puxéchesnos á proba, refináchesnos como a prata no crisol,

¹¹ fixéchesnos caer na trampa, puxéchesnos ó lombo unha carga.

¹² Deixaches pasar as xentes por riba das nosas cabezas; pasamos por lume e auga, pero logo déchesnos respiro.

¹³ Eu irei á túa casa con ofrendas, cumprireiche os votos

¹⁴ que pronunciaron os meus labios, que prometeu a miña boca na aflición.

¹⁵ Ofrecereiche sacrificios de grosos animais, fume recendente de carneiros, inmolareiche bois e cabritos.

¹⁶ Vide os que temedes o Señor, e contareivos o que El fixo por min.

¹⁷ Chameino coa miña boca e loeino coa miña lingua.

¹⁸ Se eu tivese maldade no corazón, non me escoitaría o Señor.

¹⁹ Pero Deus escoitoume, atendeu a miña súplica.

²⁰ Bendito sexa Deus, que non desbotou a miña súplica nin afastou de min o seu amor.