Salmos 64 - Biblia SEPT

(63) Palabras velenosas

¹ Do mestre do coro. Salmo de David.

² Escoita, Deus, a miña voz que se queixa; gárdame dos inimigos que me aterran;

³ escóndeme da conxura dos malvados, do barullo dos malfeitores.

⁴ Afían coma coitelos a súa lingua e disparan coma frechas palabras velenosas;

⁵ tiran desde o tobo ó inocente, para o ferir por sorpresa, sen seren vistos.

⁶ Teiman nos seus proxectos maliciosos, acordan poñer trapelas e din: —"Quen as descubrirá?".

⁷ Inventan maldade e esconden o invento nos recantos do corazón.

⁸ Mais tira Deus as súas frechas e féreos de improviso.

⁹ As súas linguas vólvenselles ruína, e cantos o ven búrlanse deles.

¹⁰ Todas as xentes temen, refiren a acción de Deus e meditan nos seus feitos.

¹¹ Alégranse os xustos co Señor, buscan nel agarimo, exultan os de recto corazón.