Salmos 61 - Biblia SEPT

(60) O agarimo das túas ás

¹ Do mestre do coro, con instrumentos de corda. De David.

² Escoita, Deus, a miña súplica, atende a miña oración.

³ Chámote desde o cabo da terra co corazón desfalecido. Lévame a unha rocha inaccesible:

⁴ ti es o meu refuxio, a miña torre forte fronte ó inimigo.

⁵ Quixera vivir por sempre na túa tenda, esconderme ó agarimo das túas ás.

⁶ Ti, Deus, acolles os meus votos e dásme o herdo dos que respectan o teu nome.

⁷ Os días do rei engádelle días, que dure por longas xeracións;

⁸ que na presenza de Deus reine por sempre, que o garden o seu amor e a súa fidelidade.

⁹ Eu cantarei sempre o teu nome, cumprirei a cotío os meus votos.