Salmos 60 - Biblia SEPT

(59) Pobo rexeitado, en desfeita

¹ Do mestre do coro, coa cítara de Xuxán, edut. Poema de David, para ensino.

² Cando loitou contra Aram Naharaim e contra os arameos de Zoba e bateu os edomitas no Val do Sal: doce mil homes.

³ Ti tesnos, Deus, rexeitados e fendidos, estás irado connosco. Restablécenos.

⁴ Fixeches tremer a terra, fendíchela; repara as súas fendas, porque cambalea.

⁵ Ti fixéchesllas pasar duras ó teu pobo, déchesnos a beber viño atordante.

⁶ Dálles un sinal ós que te temen e que poidan fuxir da frecha;

⁷ para que poidan librarse os teus amigos, respóndenos coa salvación da túa dereita.

⁸ O Deus santo tiña dito: —"Cantarei triunfo, partirei Xequem e parcelarei o val de Succot;

⁹ meu é Galaad, meu Menaxés helmo da miña cabeza Efraím e Xudá o meu cetro;

¹⁰ Moab é a talla en que me baño, sobre Edom poño as sandalias e canto triunfo sobre Filistea".

¹¹ Quen me levará a unha praza forte? Quen me guiará ata Edom?

¹² Quen, se non ti, Deus, que nos rexeitaches, o Deus que non sae co noso exército?

¹³ Axúdanos ti no apuro, pois a axuda do home é va.

¹⁴ Con Deus faremos fazañas, el esmagará os nosos opresores.