Salmos 53 - Biblia SEPT

(52) Non hai quen faga o ben

¹ Do mestre do coro, segundo Mahalat. Poema de David.

² Pensan os parvos para si: —"Deus non está". Corrompidos, de conduta abominable: non hai quen faga o ben.

³ Deus observa os homes desde o ceo, para ver se hai algún asisado, algún que pregunte por Deus.

⁴ Andan todos desviados, por xunto corrompidos. Non hai quen faga o ben, non hai sequera un.

⁵ É que non aprenderán os malfeitores? Engolen o meu pobo coma pan, sen preguntaren por Deus.

⁶ Alá van tremendo de medo, cando non había razón para temer. Deus esparexe os ósos dos traidores; e eles avergónzanse de ti porque Deus os rexeita.

⁷ Quen lle traerá de Sión a salvación a Israel? Cando vire o Señor a sorte do seu pobo, exultará Xacob, alegrarase Israel.