Salmos 52 - Biblia SEPT

(51) Malos e bos terán a súa recompensa

¹ Do mestre do coro. Poema de David.

² Cando veu Doeg, o edomita, onda Xaúl para lle dicir: David está na casa de Abimélec.

³ Que gloria atopas na maldade, home potente e desapiadado?

⁴ Pasas o día a tramar crimes, a túa lingua é coma navalla afiada, ti, artífice do engano.

⁵ Prefires o mal ó ben, a mentira á palabra xusta;

⁶ gustas das conversas que corroen, ti, lingua embusteira.

⁷ Por iso Deus hate destruír enteiramente: hate coller e botar da túa tenda, arrincarache a raíz da terra da vida.

⁸ O velo, os xustos crerán, e farán a burla del:

⁹ —"Este é o valente que non buscaba en Deus refuxio. Confiaba nas súas riquezas, facíase forte nos seus crimes".

¹⁰ Mais eu son oliveira verde na casa do Señor. Confío no amor de Deus polos séculos, por sempre.

¹¹ Loarei decote os teus feitos, esperarei no teu nome, porque ti es bo cos amigos.