Salmos 51 - Biblia SEPT

(50) Miserere

¹ Do mestre do coro. De David.

² Cando o veu ver Natán o profeta, despois de se ter xuntado David con Batxeba.

³ Apiádate de min, meu Deus, pola túa bondade, pola túa misericordia, borra o meu pecado;

⁴ lávame ben da miña iniquidade, límpame da miña culpa.

⁵ Eu recoñezo o meu pecado e teño sempre presente a miña culpa.

⁶ Contra ti, contra ti mesmo, eu pequei e fixen o que é malo ós teus ollos: por iso será xusta a túa sentencia e aparecerá recto o teu xuízo.

⁷ Si, eu nacín no pecado, no mal concibiume miña nai;

⁸ e ti amas a verdade no corazón e no íntimo ensínasme sabedoría.

⁹ Purifícame co hisopo, e serei limpo, lávame ti, e quedarei branco coma a neve.

¹⁰ Faime sentir o gozo e a ledicia, que relouquen os meus ósos quebrantados.

¹¹ Arreda do meu pecado a túa vista e borra as miñas culpas.

¹² Crea, Deus, en min un corazón puro, renóvame por dentro cun espírito firme.

¹³ Non me botes da túa presenza e non tires de min o teu santo espírito.

¹⁴ Devólveme a alegría da túa salvación, sostenme co espírito xeneroso.

¹⁵ Ensinarei o teu camiño ós pecadores e volverán a ti os descarreirados.

¹⁶ Líbrame dos delitos de sangue, Señor, meu Deus e salvador, e a miña lingua contará a túa xustiza.

¹⁷ Abre, Señor, os meus labios, e a miña lingua pregoará a túa loanza.

¹⁸ Con sacrificios ti non te compraces, se che ofrezo holocaustos, non os aceptarás:

¹⁹ O meu sacrificio, Deus, será o espírito contrito: o corazón contrito e humilde ti, Deus, non o desprezas.

²⁰ Faille ben a Sión, pola túa bondade, restaura os muros de Xerusalén.

²¹ Entón aceptarás os sacrificios puros, inmolaranse xovencos nos teus altares.