Salmos 48 - Biblia SEPT

(47) A cidade do noso Deus

¹ Cántiga. Salmo, dos coreítas.

² Grande é o Señor e digno de loanza na cidade do noso Deus.

³ O monte santo, fermoso outeiro, é o gozo de toda a terra; o monte Sión, cima setentrional, a capital do gran rei.

⁴ Deus nos seus alcázares deuse a coñecer coma refuxio.

⁵ Vede que se uniron os reis, para marcharen xuntos contra ela;

⁶ mais, ó vela, admiráronse, turbáronse, fuxiron asustados.

⁷ Colleunos alí o terror, un tremor coma de parto,

⁸ coma cando o vento do leste esnaquiza as naves de Tárxix.

⁹ Como o oiramos, así o vimos na cidade do Señor dos exércitos, a cidade do noso Deus: Deus fíxoa firme para sempre.

¹⁰ Nós festexamos, Deus, o teu amor dentro do teu santuario.

¹¹ Coma o teu nome, Deus, así a túa loanza chega ós confíns da terra. A túa dereita está chea de xustiza;

¹² Alégrase o monte Sión, as cidades de Xudá reloucan, á vista dos teus xuízos.

¹³ Dádelle a volta a Sión, contade as súas torres,

¹⁴ fixádevos nos seus muros, percorrede os seus pazos, para podelo contar á xeración futura.

¹⁵ O noso Deus de sempre e para sempre, El é quen nos guía por riba da morte.