Salmos 47 - Biblia SEPT

(46) O rei de toda a terra

¹ Do mestre do coro. Dos coreítas, salmo.

² Aplaudide, pobos todos, aclamade a Deus con cancións.

³ O Señor é excelso e terrible, o grande rei de toda a terra.

⁴ El subxuga os pobos para nós, pon debaixo nosa as nacións.

⁵ Escolle para nós a nosa herdade, orgullo de Xacob, o seu amado.

⁶ Deus sobe entre aclamacións, o Señor, ó son de trompetas.

⁷ Cantádelle a Deus, cantádelle, cantádelle ó noso rei, cantádelle.

⁸ Deus é o rei de toda a terra: cantádelle con xeito.

⁹ Deus reina sobre as nacións, sentado no seu trono sagrado.

¹⁰ Os nobres dos pobos xúntanse co pobo de Deus de Abraham, pois de Deus son os grandes da terra: e El, o máis excelso.