Salmos 25 - Biblia SEPT

(24) Móstrame os teus camiños

1 De David.

¹ De David. Cara a ti ergo, Señor, a miña alma,

² en ti, meu Deus, confío. Que non se rían de min os inimigos.

³ Ninguén que en ti espere quedará defraudado, mentres se avergonzarán os traidores sen razón.

⁴ Móstrame, Señor, os teus camiños, ensíname os teus sendeiros,

⁵ diríxeme na túa verdade, apréndeme, pois ti es, Deus, o meu salvador e estoute a esperar todo o día.

⁶ Lémbrate, Señor, da túa compaixón e do teu amor, pois existen desde sempre.

⁷ Dos erros e das culpas da miña mocidade non te lembres: acórdate de min segundo o teu amor, Señor, pola túa bondade.

⁸ O Señor é bo e recto: por iso ensínalles o camiño ós extraviados,

⁹ dirixe ós xustos no xuízo e móstralles ós humildes o vieiro.

¹⁰ Os camiños do Señor son todos amor e lealdade, para os que gardan a súa alianza e as súas instrucións.

¹¹ Polo teu nome, Señor, perdoa as miñas culpas, que son grandes.

¹² Quen é o que teme ó Señor? El ensínalle o camiño que ha elixir:

¹³ pasará a vida con ben, herdarán a terra os seus fillos.

¹⁴ O segredo do Señor é para os que o temen, e instrúeos coa súa alianza.

¹⁵ Teño sempre postos os ollos no Señor, pois El tira da rede os meus pés.

¹⁶ Vóltate cara a min e tenme compaixón, pois estou só e aflixido.

¹⁷ No meu corazón medra a pesadume; líbrame ti das angustias.

¹⁸ Olla a miña aflición e os meus traballos, e perdoa os meus erros.

¹⁹ Olla os meus inimigos, cantos son, e o odio violento que me teñen.

²⁰ Gárdame a vida, sálvame; non me vexa defraudado por acollerme a ti.

²¹ A inocencia e a rectitude hanme protexer: a miña esperanza está en ti.

²² Redime, Deus, a Israel de todas as súas angustias.