Salmos 21 - Biblia SEPT

(20) Bendición para o rei

¹ Do mestre do coro. Salmo de David.

² Señor, co teu poder alégrase o rei, exulta coa túa vitoria.

³ Ti outórgaslle o que arela o seu corazón, non lle negas o que piden os seus labios.

⁴ Sáeslle ó encontro coa túa bendición e poslle na cabeza coroa de ouro fino.

⁵ Pídeche vida, e ti dáslle abundancia de días sen fin.

⁶ A súa gloria medra coa túa axuda; revístelo de honor e maxestade.

⁷ Dáslle constante bendición, alégralo coa túa presenza.

⁸ O rei confía no Señor, e co favor do Altísimo non cae.

⁹ Aprese a túa man a todos os teus inimigos, agarre a túa dereita ós que te odian;

¹⁰ préndelles lume, coma a un forno, na hora en que te mostres. Que o Señor os consuma na súa ira, que enteiros o lume os engula.

¹¹ Extirpa da terra o seu froito, a súa caste de entre os homes.

¹² Anque boten maldade sobre ti e urdan insidias, non han prevalecer,

¹³ pois ti faralos fuxir, tensarás o arco contra eles.

¹⁴ Érguete, Señor, no teu poder; nós cantaremos con salmos a túa forza.