Salmos 2 - Biblia SEPT

O Señor co rei-mesías

¹ Por que barullan as nacións e os pobos planean en balde?

² Os reis da terra levántanse, os príncipes conspiran entre si contra o Señor e o seu mesías:

³ —"Rompamos as súas sogas, botemos de nós as súas cadeas".

⁴ O que mora no ceo sorrí, o Señor búrlase deles.

⁵ Logo fálalles con ira e estarréceos con asaño.

⁶ —"Eu son quen puxo o meu rei sobre Sión, o meu monte santo".

⁷ Pregoarei o decreto do Señor; foi El quen me dixo: —"Ti es meu fillo, eu mesmo che dei hoxe a vida.

⁸ Pídeme, e dareiche por herdade as nacións; por posesión, os termos da terra.

⁹ Poderás rexelos con cetro de ferro, rompelos, coma ola de barro".

¹⁰ Entendede ben, reis, aprendede, os que rexedes a terra:

¹¹ Servide o Señor con temor, con tremor facédelle festa;

¹² non se alporice e perezades, pois nun instante se acende a súa ira. Ditoso o que nel busca agarimo.