Salmos 17 - Biblia SEPT

(16) Como a meniña dos teus ollos

1 Pregaria de David.

¹ Pregaria de David. Oe, Señor, a causa xusta, atende ó meu clamor; escoita a miña pregaria de labios sen engano.

² Que a miña causa saia ben de onda ti, que os teus ollos vexan o dereito.

³ Se sondas o meu corazón, se me visitas de noite, se me probas ó lume, nada atoparás: a iniquidade non atravesa a miña boca,

⁴ como é costume nos homes. Conforme á palabra dos teus labios, sigo o camiño marcado;

⁵ guío polas túas pisadas os meus pasos, por iso os meus pés non tremelan.

⁶ Eu chámote, Deus; ti respóndeme; volve a min o teu oído, escoita a miña voz.

⁷ Mostra a túa compaixón admirable, ti que libras do inimigo ós que se acollen á túa dereita.

⁸ Gárdame coma á meniña dos teus ollos, escóndeme á sombra das túas ás

⁹ dos malvados que me asaltan, dos inimigos que me cercan.

¹⁰ Pechan as súas entrañas e falan con soberbia.

¹¹ Dan pasos para rodearme, espréitanme para botarme por terra,

¹² coma o león que degora a súa presa, coma o leonciño engruñado na cova.

¹³ Érguete, Señor; failles fronte e dobrégaos; líbrame coa túa espada dos malvados,

¹⁴ coa túa man, Señor, dos mortais, dos mortais do mundo, que teñen sorte na vida: enchen o ventre cos teus bens, fártanse os seus fillos e deixan o resto para os seus nenos.

¹⁵ Mais eu verei con felicidade a túa presenza, ó espertar, saciareime de verte.