Salmos 149 - Biblia SEPT

Cantos do pobo de Sión

¹ Aleluia. Cantádelle ó Señor un cántico novo, loádeo na asemblea dos xustos.

² Alégrese Israel co seu facedor e os fillos de Sión relouquen co seu rei.

³ Festexen coa danza o seu nome, cántenlle con pandeiros e arpas,

⁴ porque o Señor ama o seu pobo e coroa os humildes coa vitoria.

⁵ Exulten os xustos no triunfo e canten xubilosos nos seus postos,

⁶ coa loanza de Deus nas gargantas e a espada de dobre fío na súa man.

⁷ Farán vinganza entre as xentes e escarmentos nas nacións;

⁸ Atarán con cordas ós seus reis e con cadeas ós seus nobres.

⁹ cumprir neles a sentencia ditada, será un honor para os seus amigos. Aleluia.