Salmos 148 - Biblia SEPT

Canto de todas as criaturas

¹ Aleluia. Loade o Señor desde o ceo, loádeo alá nas alturas.

² Loádeo os seus anxos, loádeo os seus exércitos.

³ Loádeo, sol e mais lúa, loádeo, lucentes estrelas.

⁴ Loádeo os ceos dos ceos e as augas dos espazos celestes.

⁵ Loen o nome do Señor, pois mandouno El e foron feitos;

⁶ estableceunos para sempre e deulles leis que non fallan.

⁷ Loade o Señor desde a terra, monstros e abismos do mar,

⁸ raios e sarabia, neve e néboa, furacán que cumpre as súas ordes,

⁹ montes e todos os outeiros, árbores froiteiras e mais cedros,

¹⁰ feras e gando todo, réptiles e mais paxaros;

¹¹ os reis e todas as nacións, os príncipes e os xuíces da terra,

¹² os mozos e mais as doncelas, os vellos e mais os neniños.

¹³ Loen o nome do Señor, pois só o seu nome é excelso, a súa maxestade cobre a terra e mais o ceo.

¹⁴ El ergue a cabeza do seu pobo, loanza de todos os xustos, dos fillos de Israel, os seus achegados. Aleluia.