Salmos 147 - Biblia SEPT

(146 - 147) Marabillosos feitos

¹ Loade o Señor, pois é bo cantarlle ó noso Deus; a loanza élle debida.

² O Señor reconstrúe Xerusalén e reúne os dispersos de Israel.

³ Sana os corazóns quebrados e venda as súas feridas.

⁴ Conta as estrelas sen número e chama a cada unha polo nome.

⁵ O noso Señor é grande e poderoso, para a súa sabedoría non hai medida.

⁶ O Señor ergue os humildes e abaixa no chan os malvados.

⁷ Cantádelle ó Señor acción de grazas, tocádelle a arpa ó noso Deus.

⁸ El cobre o ceo de nubes e dispón a chuvia para a terra; fai saír herba nos montes,

⁹ dálle ó gando o sustento, ós pitiños dos corvos o que piden.

¹⁰ Non pon a súa compracencia na forza do cabalo nin nos riles dos homes o seu contento.

¹¹ O Señor pon o seu contento nos que o temen, nos que confían na súa misericordia.

¹² Glorifica ó Señor, Xerusalén, loa o teu Deus, Sión.

¹³ El reforza os ferrollos das túas portas e bendice os teus fillos no teu seo.

¹⁴ Establece a paz nos teus confíns e fártate de flor de trigo.

¹⁵ El manda á terra a súa mensaxe e a súa palabra corre lixeira.

¹⁶ Produce neve coma la e espalla xeada coma cinsa;

¹⁷ esparexe coma faragullas o carambelo e de frío xéanse as augas.

¹⁸ Manda a súa palabra e derrétense, sopra co seu alento e corre a auga.

¹⁹ El anuncia a Xacob os seus proxectos, os seus estatutos e mandatos a Israel.

²⁰ Non fai así con outros pobos que descoñecen as súas decisións. Aleluia.