Salmos 145 - Biblia SEPT

(144) A fartura de todos os viventes

1 Himno de loanza, de David.

¹ Himno de loanza, de David. Meu Deus e meu rei, quero enxalzarte e bendicir por sempre o teu nome.

² Bendicireite o día enteiro, loarei por sempre o teu nome.

³ Grande é o Señor e digno de loanza, a súa grandeza é insondable.

⁴ Unha xeración gáballe a outra os teus feitos e cóntalle as túas fazañas.

⁵ Falan da gloria da túa maxestade, e eu refiro as túas marabillas.

⁶ Pregoan os teus poderosos escarmentos, e eu anuncio a túa grandeza.

⁷ Transmiten a memoria da túa gran bondade e cantan a túa xustiza.

⁸ O Señor é clemente e compasivo, tardo á ira e rico en amor.

⁹ O Señor é bo para todos, agarimoso con todas as súas obras.

¹⁰ Lóuvente, Señor, as túas obras, bendígante os teus amigos.

¹¹ Pregoen a gloria do teu reino, proclamen as túas fazañas.

¹² Ensinen ós homes a túa forza e a maxestade gloriosa do teu reino.

¹³ O teu reino é reino eterno, o teu goberno dura por xeracións.

¹⁴ O Señor sostén a todos os que caen e endereita os que se dobran.

¹⁵ Todos os ollos cara a ti agardan que ti lles deas o sustento ó seu tempo.

¹⁶ Abres ti a túa man e dáslle fartura a todo ser vivo.

¹⁷ O Señor é xusto nos seus camiños todos, bo en todos os seus feitos.

¹⁸ O Señor está cerca dos que o chaman, dos que sinceramente o invocan.

¹⁹ El cumpre a vontade dos que o temen, escoita o seu pranto e socórreos.

²⁰ O Señor garda ós que o aman, pero desbota os malvados.

²¹ A miña boca pregoará as loanzas do Señor e todos os seres vivos bendicirán o seu nome santo polos séculos dos séculos.