Salmos 140 - Biblia SEPT

(139) Líbrame do home malo

¹ Do mestre do coro. Salmo de David.

² Líbrame, Señor, do home malo, gárdame do home violento.

³ Matinan maldade no corazón e promoven contendas todo o día.

⁴ Afían, coma a serpe, as súas linguas, con veleno de áspide nos labios.

⁵ Deféndeme, Señor, do poder dos malvados, gárdame dos homes violentos, que traman facerme caer.

⁶ Os soberbios téndenme lazos, esconden cordas e rede, póñenme trampas á beira do camiño.

⁷ Eu dígolle ó Señor: —"Ti es o meu Deus, escoita, Señor, a miña súplica".

⁸ Señor, o meu dono, o meu poderoso salvador, o que no día da loita me cobre a cabeza;

⁹ non consintas, Señor, o antollo dos malvados, non favorezas os seus proxectos e que triúnfen.

¹⁰ A cabeza dos que me abouxan que a cubran as intrigas dos seus labios;

¹¹ que chovan carbóns acesos sobre eles, que os boten en fosas das que non poidan levantarse.

¹² Que non asenten na terra as malas linguas, que a desgraza sorprenda ós violentos.

¹³ Eu sei que o Señor lles fará xustiza ós pobres e lles dará o seu dereito ós aflixidos.

¹⁴ os xustos loarán, de certo, o seu nome, os rectos habitarán na túa presenza.