Salmos 135 - Biblia SEPT

(134) Canto dos elixidos

¹ Aleluia. Loade, servidores do Señor, loade o nome do Señor,

² os que estades na casa do Señor, nos adros da casa do noso Deus.

³ Loade o Señor, que é bo, cantade o seu nome, que é amable.

⁴ Elixiu para si a Xacob, a Israel coma posesión de seu.

⁵ Eu sei que o Señor é grande, o noso Deus máis cós deuses todos.

⁶ O Señor fai canto se propón no ceo e mais na terra, nos mares e nos abismos.

⁷ El fai subir as nubes no horizonte, solta a chuvia con lóstregos, saca dos seus depósitos os ventos.

⁸ El feriu os primoxénitos de Exipto, o mesmo os dos homes cós dos gandos.

⁹ En Exipto fixo sinais e prodixios contra o faraón e os seus servos.

¹⁰ Bateu a moitas nacións e matou a reis poderosos,

¹¹ A Sihón, rei dos amorreos, a Og, rei de Baxán, a todos os reis de Canaán,

¹² e deulle as súas terras en herdanza, en posesión, ó seu pobo.

¹³ O teu nome, Señor, é eterno, o teu recordo vive polas xeracións.

¹⁴ O Señor goberna ó seu pobo, ten piedade dos seus servos.

¹⁵ Os ídolos dos xentís son prata e ouro, feitura das mans dos homes.

¹⁶ Teñen boca e non falan, teñen ollos e non ven,

¹⁷ teñen orellas e non oen e non hai alento na súa boca.

¹⁸ Coma eles son os que os fan e cantos neles confían.

¹⁹ Casa de Israel, bendice o Señor, casa de Aharón, bendice o Señor,

²⁰ casa de Leví, bendice o Señor, amigos do Señor, bendicide o Señor.

²¹ Bendito o Señor en Sión, o que habita en Xerusalén. Aleluia.